Omupopiliko wouministeli womidingonoko eefuka, novapashiono, Romeo Muyunda okwa kumaida oshiwana opo shi kaleke eenhele dokupashiona da yela pefimbo lomatango manene.

Muyunda okwa ti okwa didilikwa efimbo e li lomatango manene eenhele dokupashiyona haku kala kuyadi ovanhu tave lihafifa ashike vamwe ohave di fiye da kaka.

Onghee okwa ti osha fimana opo oshiwana shi kwashilipaleke kutya otashi kaleke po eenhele da yela nawa molwaashi oukoshoki owa fimana.

“Otashi ulike efano liwa ngeenge ovanhu ve li tava pashiyona ponhele ya yela. Onghee ngeenge onhele oya kaka otai dulu okueta omikifi odo hadi etwa kekako,” Muyunda ta ti.

Okwa ti ovanhu nava longife eendoloma da tulwa peenhele da yooloka okutula mo oimbodi.

“Ngeenge onhele ya yela otai nane ovanhu vahapu ve uye okupashiona ponhele opo. Eenhele dokupashiyona oda fimana molwaashi otadi etele ovanhu oyuuyemo neemhito doilonga,” ta ti.

Muyunda okwa kumaida yoo vali ovanhu tava ka pashiona komukunghulo wefuta opo vaha kupule oimbodi popepi nefuta.

Lwopokati opo, Muyunda okwa ti oshiwana nashi kale sha kotoka ngeenge tashi ka pashiyona komilonga ku na eengadu molwaashi eengadu oda nyika oshiponga.

“Ovanhu ngeenge tava ka pashiyona koshikunino shoinamwenyo kEtosha na ve likaleke kokule nokupiyaaneke oinamwenyo.

fhamalwa@nepc.com.na