Ehangano lyo-Mtc olya yambidhidha aalongwa ye li 14 noshimaliwa shoomilliona N$1.5 okukwathela aalongwa mboka nofuto yosikola kiiputudhilo yopombanda.
Ngoka ta yambidhidha pakathimbo koshikondo shemona lyo-MTC, Elton Katangolo okwa ti aanona mboka ya yambidhidhwa oye li momvula ontitatu omanga yamwe ye li momvula ontine.
“Otwa pumbwa okuhula ko oongaku opo tu yambidhidheni aanona taya kondjitha elongo, ye li monkalo tayi nyengana omolwoshimaliwa kaashi po, oshowo okuyambidhidha epangelo mpoka lya hulila,’’ ta kumagidha ngaaka.
Ta ti uupyakadhi mboka inau ethelwa miikaha yepangelo olyo alike, oshoka ohali yambidhidha nale aalongwa noshimaliwa oshowo ofuto yosikola. Mpoka lya hulila nali yambidhidhwe.
Ta gwedha po ta ti ehangano lyawo lyo-MTC okupitila moproyeka yomayambidhidho goshimaliwa otali tsikile okuyambidhidha aalongwa mboka kaaye na aakuluntu ye na iiyemo oshowo ya taalela onkalo ndjoka.
“Elalakano okukwatela aalongwa mboka ya mane omailongo gawo opo ya vule okugwanitha po oompumbwe dhawo oshowo okuyambidhidha natango aakwanezimo yawo,’’ ta popi ngaaka. Ta ti, onkalamwenyo oya kwatelwa komeho kelongo.
Ta popi ta ti elongo oshinima sha simana sho osho shoka ehangano lyawo tali yambidhidha ngaaka. Ta gwedha ko kutya oshilongo otashi humu ashike komeho uuna oshigwana sha longwa onkene oshigwana shomonakuyiwa osha pumbwa okuyambidhidhwa shi mone elongo.
“Otashi uvitha nayi okuuva aanona ye li pethimbo lyokulesha omambo, ashike oye li momagumbo oshoka kape na oshimaliwa shoku ya futila kiiputudhilo yopombanda, uupyakadhi mbuka owa pumbwa okupatukununwa nokukandulwa po meendelelo,’’ ta popi ngaaka.
-vkaapanda@nepc.com.na
Katangolo ta ti onkalo yaanona taya thigi po oosikola inayi ethelwa mo moshilongo, oshoka oyendji otaya ka kala inaaya longwa, kehe okanona Okanamibia oka pumbwa elongo.
Okwa popi ta ti ehangano lyo-MTC olya ndhindhilike onkalo ndjoka tayi dhana onkandangala moshilongo opo ye ye po noprogalama ndjoka yi vule okuyambidhidha yamwepo.
Ehanago lyo-MTC olya kala nokuyambidhidha uuminsteli welongo , ngaashi okutunga oosikola oshowo okuyambidhidha niizalomwa moshilongo ashihe.