Ehangano lokuyandjaneka omeva moshilongo loNamwater ola talela eshongo linene lomeva inaa wana eshi ominino edi da kula di li kOkaluheke moAngola da teka paife.

Ominino di li moAngola ohadi eta omeva fiyo omOshakati okupitila mokanaala opo oshiwana shi dule okumona omeva a wana okunwa nokulongifa momaumbo.

Omupopiliko wehangano loNamwater koitukulwa yokoonoli Johannes Shigwedha okwa ti eshi oshi li eshongo linene shaashi paife mokanaala kamu na sha vali omeva okulongifwa kovakalimo.

Okwa hokolola ta ti konima eshi ominino da teka Namwater okwa ninga onghendambala yokukala a pata manga ominino edi di li moAngola shaashi omaumbo e li popepi nOkaluheke oku li koshi yomeva taa kunguluka.

Onghee okwa ti paife omeva otaa hepa moAngola shaashi ominino oda teka. “Paife Namwater oha kufa omeva keendama domapungulilo omeva di li kOgongo nokOlushadja opo tu dule okukala twa yandja omeva koshiwana pefimbo e li lominino da teka,” Shiwedha ta ti.

Okwa hokolola ta ti omeva aa taa di keendama nokOlushandja inaa wananena ovakalimo vahapu ashike elalakano okukandula po omukundu womeva pokafimbo.

Shigwedha okwa ti ovanhu ove lipyakadili nokulonga ominino da teka opo omukundu u kale wa kandulwa po diva. “Otashi pula oule womafiku aheyali ile 10 opo omeva a kale a fika mOshakati okudilila moAngola shaashi omeva otaa ende oshinano 160km,” Shigwedha ta ti. Okwa weda po ta ti Namwater oha andjaneke omeva koitukulwa ihapu monooli onghee paife  ita ka dula vali okuayandjaneka omeva a wana shaashi ominino oda teka.

Shigwedha okwa kunghulila oshiwana opo shi kale tashi longifa omeva nawa shaashi paife kape na vali omeva a wana. 

– fhamalwa@nepc.com.na