TSANDI - Ehangano lyokutunga omagumbo lyoNational Housing Enterprise (NHE) olya mana okutunga omagumbo ge li 33 koTsandi moshitopolwa shaMusati ngoka ga tungwa kondando yoomiliona N$10.
Kakele kokoTsandi NHE okwa tunga wo omagumbo ge li 235, ya tunga kOkahao 70, Outapi 26, Ondangwa 24, Omuthiya 50, Gobabis 65 oshowo oku endukulula omalukanda gamwe moWindhoek.
MuKotoba gwomumvo gwa zi ko NHE okwa li a tungu omagumbo ge li 81 kOutapi.
Pethimbo lyokugandja omagumbo gokoTsandi, ominista yiitopolwa noondoolopa noyokuushayi Erastus Uutoni, okwa ti oku shi shi nawa kutya Aanamibia oyendji unene mboka ye na iiyemo yopokati niishona oye li mompumbwe onene yokwiimonena omagumbo.
“Otaya ka vula owala okulanda omagumbo ngele omalelo goondoolopa oga tameke oku pa po noondando dhi li nawa dhevi,” Uutoni ta ti.
Minista ta ti omagumbo ngoka ge li 33 otashi vulika taga monika omashona, ashike ngele oto shi tala nawa, oto mono kutya ngashi ngeyi oofamili dhi li 33 nda mona omalukalwa ngoka taga kalele sigo okomapipi tage ya.
Uutoni okwa ti onga uuministeli womagumbo, otaya ka kala nokuyambidhidi kehe osheetwapo shoka tashi ka kandula po omukundu gwomagumbo moshilongo.
“Inatu ipyakidhila unene nokuninga oshimaliwa tashi zi mevi lya nuninwa omalukalwa gaantu ihe natu nyanyukilwe eputuko ndyoka tali etwa koondoolopa dhetu komatungilo gomagumbo. Epungulo lyuulethimbo ndyoka tali ya po omolwaokudhika omalukalwe olya simana noonkondo koondoolopa dhetu shi vulithe oshimaliwa shoka tashi ya po osheendelela okupitila melanditho lyevi,” Uutoni ta ti.
Omunashipundi gwokangundumutima ka-NHE, Toska Sem okwa ti nonande omagumbo oga pumba moNamibia, NHE aluhe ota kambadhala okuyapo nomagumbo gongushu noge na ondando tayi vulu okwiidhidhimikilwa.
“Otatu pula ayehe mboka ye na mo ontumba moshinima shomagumbo opo ya gandje iikwa niipangitho opo NHE a vule okutunga omagumbo nokweedhilila oshigwana shaNamibia.
Opo omalelo goondoolopa pondondo yakwalukehe taga vulu okugandja evi ku-NHE, tse tu vule oku adha elalakano lyuukumwe, ndyoka lyokugandja omagumbo koshigwana,” Sem ta ti.
Sem okwa totha mo kutya opoloyeka oya vulu okupwa mbala muule ashike woomwedhi ntano, oku yelekanitha noomwedhi heyali ndhoka dhali dha dhiladhilwa.
Ta ti ehangano lyoKamba Trading olyo lya pondola oku tunga omagumbo ngoka meendelelo. Omunashipundi gwelelo lyaTsandi village council Selma Kadhila, okwa ti egandjo lyomagumbo ngoka oku za kuNHE oku ya kelelo lyondoolopa otashi ulike eitulomo lyepangelo oku eta po omalukalwa goshigwana.