Ovakalimo vomomukunda Okaku-A moshitukulwa shaMusati ove li monghumwe eshi oikombo i li 17 ya kwatwa nokudipawa oshita koluvadi momukunda wavo.

Oshiningwanima osha ningwa Omaandaxa efimbo lokomatango.

Kansela moshikandjohoololo shaShikuku Matheus Gabriel okwa ti fiyo opapa kape na ouyelele kutya oikombo oya lyelye onghee ombelewa yaye otai indile moshiwana kwaau a kanifa oikombo opo a ka tale oikombo i li koshi yomuti ngeenge oyaye.

Omunambelewawiliki wonghalo yomhepo Odilo Kgobetsi okwa kumaida oshiwana opo shiha lye ombelela yoimuna ya kwatwa kokashelu shaashi osha nyika oshiponga komunhu onghee oshiwana nashi topolelafane ouyelele momikunda opo shiha lye ombelela oyo.  Kgobetsi okwa ti oshiwana nashi xulife po okushingila oikombo koshi yomiti ngeenge odula tai loko. Okwa ti osha nyika oshiponga ngeenge oikombo i li koshi yomuti pefimbo lodula tai shela shaashi ohashi eta noupu opo oikombo i kale ya kwatwa kokashelu.  “Ovanhu ngeenge ve wete odula i li popepi nokuloka nava tameke okweende tava shingi oimuna ya uka popepi neumbo opo ngeenge odula ya tameke okuluka, oimuna otai twalwa koshuunda,” ta ti. Okwa weda po ta ti ovakulunhu nava popye nounona vavo ngeenge va ka lifa opo va twale oimuna koshuunda ngeenge taku lokwa ndele haku haama odula koshi yomiti mumwe noimuna.

“Oshiwana nashi xulife po okulongifa eengodi ngeenge taku lokwa shaashi ongodi ohai nane noupu okashelu ka kwate,” ta ti.

Okwa yelifa ta ti okashelu oke hole okukwata ngeenge omunhu ile oshimuna shi li popepi nomuti ile neepaala dolusheno.

“Ovanhu nava topolelafane ouyelele momikunda davo kombinga yokashelu opo va kale tave liufa komilandu nokukelela vaha ninge oihakanwa yokashelu,” ta ti. -fhamalwa@nepc.com.na