ONDANGWA - Omukulupe gwedhina Martha Johannes, a yambukile momukunda Oluundje moshitopolwa shaShikoto okwa ti ota pumbwa ekwatho opo a paluthe nokuyambidhidha okatekulu ke hoka ke na uulema, kedhina Junias Atusheni Nafuka gwomimvo ntano. 

Omukulupe nguka okwa popi ta ti, shoka unene ta indile moshigwana okuyambidhidhwa nokatemba, opo onkalo yi hwepopale. 

Atusheni iha popi, iha ende, iha kuutumba ye iha vulu okulya kuye mwene. 

“Omutekulu gwandje okwa valwa nuulema mbuka, ihe osha kala oshidhigu oshoka atuhe nayina katu na iiyemo yasha. He, katu mu shi,’’ omukulupe ta popi ngaaka.

Omukulupe okwa ti, omonakadhona yina yokanona hoka naye okwa taalela onkalo ondhigu oshoka ke na iilonga okuyambidhidha okanona ke. 

Ta gwedha po ta ti, oN$250 ndjoka haya kwata komwedhi omolwuunkundi wokanona, ihayi gwanitha po oompumbwe adhihe dhokanona. 

“Atusheni oha li iikulya iipu ashike, open a wo ompumbwe yominambo noothewa oshowo omagadhi goshipa she kehe omwedhi. Ohandi mu fala koshipangelo iikando ya pita pwiitatu momwedhi, nolefa ohayi pula ndje oshimaliwa oshindji okuya nokugaluka,” ta ti ngaaka. 

Omukulupe okwa gwedha po ta ti, Atusheni oku li mompumbwe yokatemba oshoka iha vulu okweenda, oha kala owala a lala ethimbo alihe.

Ta ti, okatemba otaka vulu okukwathela poompito odhindji.   Omukulupe ta ti, ohashi mu uvitha nayi okupula aluhe omakwatho, aantu nayo ohaya loloka, ihe ke na nkene.

“Otandi indile moshigwana kukehe ngoka ta vulu okuyambidhidha omumwandjekadhona ngoka e na oomvula 28, niilonga yoludhi kehe, opo a vule okugwanitha po oompumbwe dhokanonona ke oshowo nangame mwene,” omukulupe ta indilile omona.

Kehe ngoka ta vulu okuyambidhidha nakehe shoka ta vulu, okwa manguluka okundhenga konomola yomukulupe yopeke 0814407 710. Omukulupe okwa ti, ota ka pandula kehe ngoka ta ka yambidhidha omutekulu gwe, oshoka okwa taalela onkalo ondhigu lela.

vkaapanda@nepc.com.na