SWAKOPMUND –  Omukalimo gwomoSwakopmund, Cheryl Antoinette Green (57), ngoka a li a kwatwa po oshiwike sha za ko sho a li a kwata nepangwe ndyoka ta ti iihemba, okwa li a pewa ombooloha yooN$5000. Green okwa li a tulwa miipandeko komiya dhaShinana, ta fekelelwa okuyenga omagadhi gepangwe osho wo a adhika niimeno yepangwe otututu, yi li 71.

Omonamati ngoka oye a li a mangwa po nokufala opolisi pegumbo lyawo, moka oshikuninio shika sha adhika, okwa pewa egeelo lyokufuta ooN$2000. Green ngashingeyi okwa taalela iipotha yi na sha noku adhika nokulonga niingangamithi.
Opolisi oya li ya  kutha po iimeno 71 mbyoka yi na oshiviha shookilograma 3,5, oogalama 26 dhepangwe osho wo omagadhi gepangwe mbyoka taku tengenekwa  yi na ongushu yooN$22 000. Green okwa li a tindilwa ombooloha sho  a li a holoka lwotango mompangu komeho gaMangestalata Conchita Olivier.

Sho ti ipopile, okwa lombwela ompangu kutya shi valelwe nando efo limwe lyi pita mo megumbo lye nelalakano lyokulanditha nokwa ti okwa li ashike a tsike uumeno mbuka wa indikwa molwomatompelo gopaunamiti.

 “Omusamane gwandje ota ehama omukithi tagu hala oku mu faalela nohandi mu panga nomagadhi ngaka. Ihandi longo niingangamithi,” Green ta lombwele ompangu ngaaka. Okwa li wo a lombwele ompangu kutya nomusamane gwe ngoka wo naye omo a li mompangu ethimbo ndoka nokwa li ta ende e li kokatemba, okwa pumbwa ekwatho noita vulu okukala oye awike. Ota ka holoka ishewe mompangu momasiku 20 Maalitsa 2019.