ONDANGWA - Elelo lyondoolopa yaNdangwa olya tameke okulonga ongalama, yookilometa 1.3 tayi tulwa oteya, koshimaliwa shi thike poomilliona N$1.8.
Ndhoka okwa li dha popiwa komukuluntu gwelelo lyondoolopa yaNdangwa Ismael Namugongo, esiku kwa li iilonga mbyoka ya tameke Omaandaha.
Namugongo okwa ti, ondjila ndjoka tayi longwa oyi li kOluno Extension 1.
Oproyeka ndjoka otayi kwatele mo ondjila yokweenda omeya yookilometa 1.5 km.
“Iilonga ayihe mbyoka ya kwatelwa moproyeka moka, oya tegelelwa yi kale ya pwa okulongwa moomwedhi mbali,’’ ta ti ngaaka.
Ta gwedha ko ta ti, ondoolopa otayi humu komeho notayi tsikile okulongela oshigwana omauwanawa.
Ta ti, elelo lyondoolopa olya kala nokulonga neitulemo niilonga ya yooloka, nelalakano lyokukwashilipaleka kutya ondungethaneko yokuhumitha komeho ondoolopa oshowo oku yi tula ponkatu yimwe, oya tulwa miilonga.
“Out na natango omaupyakadhi ngoka ga pumbwa okukandulwapo mondoolopa, ngaashi kombinga yokOluno,’’ ta ti ngaaka.
Namugongo okwa tumbula kutya oopate, etale lyohanya oshowo omeya oyo uupyakadhi uunene wa taalela omudhingoloko gOluno.
Ta kwashilipaleke kutya nonando ku na omaupyakadhi ngoka, elelo lyondoolopa otali tsikile okulonga nuudhiginini sigo lya eta omauwanawa ga pumbiwa koshigwana kOluno.
“Elalakano okuyambulapo nokuhumitha komeho Ondangwa oshowo okulongela aakalimo yomomudhingoloko omauwanawa,’’ ta ti ngaaka.
Kansela melelo lyondoolopa lyOndangwa Nicodemus Amadhila okwa kumagidha ehangano lya pewa iilonga mbyoka opo lyi gandje iilonga kaantu yomomudhingoloko gOndangwa ya thika 70.
Iilonga mbyoka okwa li ya pewa ehangano tali ithanwa Try Harder.
Esiku olyo tuu ndyoka, elelo lyondoolopa natango okwa li lya kwatakanitha omahala ge li 160 kondama yohanya.
Omugandji gomauyelele melelo lyondoolopa lyOndangwa Petrina Shitalangaho-Mutikisha okwa ti, oproyeka ndjoka kwa li ya pu okulongwa muJuni, oya longwa kongushu yoshimaliwa shi thike poomilliona N$7.5.
Shitalangaho-Mutikisha okwa ti, elelo lyondoolopa olya opaleke omahala ge li 178 agehe kumwe, ngoka ye ga tula omeya.
“Omahala ge li 102, gomo 178, oga tulilwa po nale oopaala dhomalusheno,’’ ta ti ngaaka.
Okwa gwedha po wo kutya otaya ka tameka okulonga ondjila yOnguta yi tulwe oteya momasiku gokomeho.
vkaapanda@nepc.com.na