ONGWEDIVA –Nonando Shiyenga ya tutika evi omasiku ngaka, onkalo yoshikukuta mUuvudhiya onkene tuu natango ya tinda okushuna omutse miipeta, noongombe odhindji odha li dha si kondjala, shika oshi ikwatelela kukansela moshitopolwa moka Amutenya Ndahafa. Uuvudhiya owa kala wa tseyika nawa wu na uulithilo itoo wu pewa lwaali noyendji oya kala nokufala ko oongombe dhawo hoka. Ashike onkalo oyu uka kuuwinayi paife sho omuloka gwa kala gwa nkundipala uule woomvula ndhika.

Oshitopolwa osha dhengwa wo kuupyakadhi womeya, noongombe ohadhi ende iinano iile, ya adha pookilometa 30 yi mone omeya. Iikando oyindji shika osha etitha omaso giimuna. Kansela ta ti onkalo ngashiingeyi oya nayipala noonkondo nope na iipongolo oyindji yoongombe yi ihanena moshitopolwa sho odhindji dha li dha si omolwa oshikukuta.

 “Aantu onkene tuu natango taya kanitha iimuna yawo nakehe mpoka to ende oto kundwa kiipongolo yiimuna,” ta ti ngaaka. Ndahafa ta ti oshitopolwa osha lokwa ashike inashi kwathela sha. Ta ti muuninginino wOponona omo ashike mu na iishana yi na omeya sha landula omvula sho ya loko. “Otu na etimaumbwile kutya omvula sho ya loko mehuliloshiwike ngiika okamwiidhi otaka ka tsapuka ngaa,” kansela ta ti ngaaka.

Opo ku kandulwe po uupyakadhi woshikukuta epangelo otali tsikile okugandja omwiidhi kaantu natango. Mongashiingeyi aantu 41 ohaya mono oomwiidhi dhiimuna.Omwaalu gwaambaka ogwa li gwa gwedhwa petameko lyaNovemba, okuza paantu 23 okuya paantu 41. Ndahafa ta ti oomwiidhi otadhi pewa ashike aakalimo yomUuvudhiya ndele haamboka ye ya mo taya kongo uulithilo. Kehe ngoka ta pewa ekwatho ndika oku na okukala e na oongombe 25 okuuka pombanda.