Victoria Kaapanda
ONGWEDIVA-Aakiintu ya tegelela okumona uunona wawo oshowo mboka ya kalela aapambele yawo moshipangelo shaNandjokwe otaya lumbu monkalo yi nyanyaleka.
Lucia Nangolo okwa li a hokololele Kundana onkalo ndjoka ye li ta ti ohaya zi metungo kali na omweelo lyo kali na omakende, olusheno nomeya.
Metungo moka ya kala haya futile mo N$23 sigo oomwedhi hamano dha piti, kali li monkalo yokuziwa komuntu.
“Ohatu lala mumwe niingulu, oombwa niinamwenyo mbyoka hayi ende uusiku oshoka kape na omweelo. Ngele okwa zi ombepo onene ekuma otali vulu oku gwa po e tali tu monitha oshiponga,” Nangolo ta ti ngaaka.
Ta gwedha po ta ti kaye na mpoka haya ikwathele ngele ya hala okandjugo nenge ya hala okwiiyoga.
Nangolo nayakwawo a li nayo oya ti otaya indile epangelo lyi ya tungile ekuma lyi li hwepo nando oya kala taye li futile.
Ngoka a thigwa po kumwene gwehala noha tambula iimaliwa mbyoka tayi futwa okwa ti, ita vulu okugandja uuyelele kombinga yonkalo ndjoka oshoka haye mwene gwehala oshowo ina hala okupopya noshifokundaneki.