Minista gomauyelele Peya Mushelenga oshiwike sha zi ko okwa popi ta ti, epangelo olya pititha oomilliona N$72 okuyambindindha uukomitiye tau ungaunga nefundja miitopolwa yokonooli.
Mushelenga okwa li a popi ngaaka pethimbo lyomutumba woCabinete Etitatu lya zi ko. ‘’Epangelo olya yambindhindha ngaaka, okukwathela oshigwana shoka sha taalela omaupyakandhi ga yooloka miitopolwa mbyoka ya dhengwa kefundja,” ta ti ngaaka. Iitopolwa yokonooli ya ponokelwa kefundja Oshana, Ohangwena oshowo Omusati. Omeya otaga lopotwa taga shuna pevi, ihe natango oguudha iishana unene moshitopolwa shaHangwena nOshana.
Omukalelipo gwaNgoloneya moshitopolwa shaHangwena Silas Nepembe okwa ti, aantu ya tulwa kootenda pakathimbo, oya taalela onkalo odhigu no taya indile omakwatho. ‘’Pomahala mpoka ye li, kapu na oolamba dhoku minikila, po ohapu kala pwaluudha unene ethimbo lyuusiku, onkene opwa pumbwa egameno lyopolisi,” ta ti ngaaka. Oya taalela wo uupyakandhi wiikulya oshowo iikuni okutema, onkene otaya tsikile oku indila omakwatho moshigwana.
Mboka ye li kootenda moshitopolwa shaShana oya lopotwa onkalo yi li hwepo oshoka oya kala noku yambindhindhwa okuza petameko. Omukalelipo gwaNgoloneya moshitopolwa shaShana Kristophine Nakandungile okwa ti, aakalimo yomoShana oyena omayakulo ogendji nonando haagehe.
“Oya kala noku yambindhindhwa niikulya, iikuni nosho tuu. Pomahala gawo opena olusheno, omeya, uundjugo oshowo omukeleli gomaliko,” ta ti ngaka.
Kundana sho kwali a talele po osenda ndyoka yi na iikanwa yefundja kEhenye, ehala okwali tali monika lya yela nomayakulo agehe gapumbiwa opo geli. Aakalimo okwali ya holola olupandu kwaashoka ya ya mbindhindhwa nasho.
Iihakanwa yefundja oya ndhindhilikwa tayi longitha nayi iikolitha oshowo okuhila omakaya. Shoka otashi lopotwa tashi ningwa unene moshitopolwa shaHangwena nonando mOshana nasho otashi ningwa ngaa.
Maria Shikongo ngoka naye e li kootenda moshitopolwa shaHangwena ota ti, oyena eyikwato pomutima lyaamboka haya nu omalovu. “Ngele oyaadha twa kotha etaya tentekepo omaulalelo gawo, etaya kotha ombaandhilila otaya vulu okufika, onkene ihatu kotha we nawa,’’ ta nyenyeta ngaaka.
Ta ti, ita yati inaya nwa omalovu, ihe naya kondolele omalovu gawo oshoka otaga vulu okueta oshiponga ,ootenda ndhoka ondhili pamwe. – vkaapanda@nepc.com.na