Eenhana- Omupedu minista wouministeli womakwatafano opashiwana noipambele yokondje yoshilongo Janelly Matundu okwa ti otaka ninga omakonaakono shina sha nomunambelewa ou a yandja oshipundi shonailona kohamba yaUkwanyama pefimbo lepako lelenga Hadino Hishongwa la li kEenhana mexuliloshivike.

Koshivilo oko okwa li ku na oipundi yomatyofa oyo ya li ya pewa ovanenenhu, ashike Ohamba yOvakwanyama Martha Mwadinomho Kristian Nelumbu okwa kalekwa omutumba shoshipulastika.

Omafano a fanekwa kovatoolinghundana otaa ulike ohamba Mwadinomho ya shaama novaleli veendodo da yooloka, mwa kwatelwa ovapolifi novakwaita veli komatyofa manga ye e li koshiplastitika. Omafano oo a fanekelwa komaendo omapenda fule kEenhana okwa eta onghumwe nehandu mokati kovakwashiwana ovo tava ti oshiningwanima osha nyika odino, noku ha fimaneka ohamba, oyo i li mwene woshitunda, ye oye a li a lenga nakufya Hishongwa. 

Vali, ohamba vati inai pewa ongala yoku tula keendo la Hishongwa, osho nasho sha eta omalipulo mokati kavahapu. 

Matundu okwa dimina kutya osho sha ningwa po osha puka. Ta ti ohamba omunhu a kula nokwa fimana.

Okwa koleka kutya ouministeli wavo oo kwa li u kwetele komesho elandulafano komaendo, mwa katelwa oku yandja oipundi kovanhu.

“Ohandi ka pula ovanhu ovo kwa li ve kwetele elandulafano kefudiko. Onda hala okuuda kutya omolwashike ve na okuninga mekulu ngaho” Matundu ta ti.

 Eshi a kwatafana naKundana omunashipundi womaelelo opamufyuululwakalo Immanuel Gaseb okwa ti ouministeli owa ninga epuko la kula.

“Naame onda fifwa ohoni. Kashi li mondjila,” Gaseb ta ti.

Okwa ovaleli vopamufyuulukalo nava pewa efimaneko poitufi yopangelo ngaashi naanaa ovaleli vakwao.

Gaseb okwa ti naye tete okwa li a pewa oshipundi shoshipulasitika, ashike konima okwa ka kufwa ko noku pewa oshipundi shetyofa.

“Naame ohamba ondei mona eshi ya pewa oshipundi shoshipulasitika. Onda handuka shaashi osha puka,” a weda po.

Omupopiliko welelo laUkwanyama Andrew Naikaku okwa ti oshi li etukano la kula kOhamba okupewa oshipundi shoshipulastika omanga ovanhu vamwe va fimanekwa nokupewa oipundi yomatyofa.

“Inatu shipanda oshikumungu eshi. Epangelo na li yandje ombili kumekulu. Ola fifa mekulu ohoni moshitunda shaye,” Naikaku ta ti.

Naikaku okwa yelifa ta ti Ohamba omunhu a fimana pamufyuululwakalo, onghee oshiwana osha pumbwa okufimaneka Ohamba.

Lopokati opo Naikaku okwa weda po yoo vali ta ti elelo ina li panda eshi mekulu ohamba ina pewa omhito yokutula ongala kombila ya Hishongwa.

“Hishongwa okwa li elanga lOhamba onghee Ohamba okwa li ya pumbwa okupewa efimaneko olo lokutulako ongala kombila,” ta ti.

Okwa ti ovaleli vopamufyuululwakalo navo nava pewa efimano ngaashi naana ovaleli vopapolitika ha pewa efimaneko.

fhamalwa@nepc.com.na