Omukulupe weedula 78, mwa kwatelwa okaana keedula heyali, nokaana keedula 11 ova fya eshi va wila momeva mexuliloshivike  moshitukulwa shaMusati. Oonakufya ova tongolwa ovo Neshelo Wilbard Nauyoma omukalimo womomukunda Oshikuyu, Johannes Panduleni omukalimo womomukunda Eenkundi naNdinonya Layapulwa Dimbulukeni Tangitate omukalimo womomukunda Olyavahenge.

Omukunakoni woimbuluma wopolifi moshitukulwa shaMusati Omupedu Commissioner Simaho Malakiya  okwa hokolola ta ti omukulupe okwa li tai koshiongalele shili momukunda wavo Olomakaya.

Omukulupe okwa li ta kendambala oku tau luka omeva eli mondjila ei hai endwa kovanhu shito, eshi a ya momeva ondobe okwa wila mo nokuxulifa shaashi ondjila okwa li ili koshi yomeva aa hapu. Olutu lomukulupe ole li tuwa komutekulu waye Osoondaxa lakaama kombada yomeva eshi okwa li ta kongwa komutekulu waye. Ounona voumati vavali navo ova fya eshi va wila mondobe yo meva pefimbo eshi kwa li tava lifa Osoondaxa. Okaana kamwe oka wila mondobe yomeva eshi kwa li taka kendambala oku tau luka omeva omanga okaana ka kwao oka fya eshi kwa li tava yoowo nava kwao pefimbo kwa li tava lifa. Opolifi oya ti onghee nga natango tai kunghulile ovadali, novakwashiwana momidingonoko opo va kale tava tonatele ounona ngeenge va pita mo meumbo shaashi oshitukulwa shaMusati osho shimwe sha didilikwa shina omwaalu muhapu wounaona va fya eshi va wila momeva neudo. “Ovadali nava kale tava popi nounona vavo unene tuu ounona voumati ngeenge tava lifa opo vaha danene omeva ile ngeenge tava di keefikola, ovakulupe ile ovanhu ve li koshi yomalodu ina pitikwa okukala tava tau luka meendobe domeva shaashi eshi oshi li shanyika oshiponga neenghono,” Malakiya ta ti.

Okwa weda po ta ti ounona ina pitikwa okukala tava lifile popepi neendobe ile nomifima domeva shaashi otava kala va kwatwe komhepo yokukadanena omeva.

– fhamalwa@nepc.com.na