Eso lyokanona koomvula 13 momukunda Olukula mOhangwena olya halutha oshigwana momudhingoloko moka konima sho taku popiwa kutya okanona hoka oka kala oshihakanwa shomahepeko gopauhulo hake ga ningilwa kuhe. Okakakadhona haka otaku lopotwa ka hulitha momasiku 27 Januali moshipangelo shepangelo shaKongo konima sho ka ulike anuwa omandhindhiliko gombuto yoHIV/Aids. Omupya omunene okanona haka inaka konaakonwa ku monike ngele oka li ke na nenge kake na ombuto ndjoka.

Nonando oshiningwanima shika osha li sha lopotelwa kansela gwoshikandjohogololo Okongo Efraim Shipindo, ngoka e shi lopota kopolisi, inaku patululwa oshipotha moshinima shika.

“Omupya omunene kutya opolisi kayi na shoka tayi vulu okuninga po moshiningwanima shika oshoka osha lopotwa komunute gwahugunina - okanona ka fumvikwa nale. Oshitiyali kapwa li omakonaakono ga ningwa kopolisi sho okanona ka li moshipangelo, nopolisi inayi mona olopota yuunamiti ndjoka tayi fatula osheetithi sheso, osho omupopiliko gwopolisi yomoshitopolwa shaHangwena, Inspector Kaume Itumba a ti ngaaka. 

A kumwa koshiningwanima shika, omuhwahwameki guuthemba womuntu Rosa Namises okwa li a pula opo omudhimba gu fumbululwe mo, ta ti nomeso, nakuningwa oshihakanwa okwa pumbwa okupewa uuyuuki.

“Oshiningwanima shika otashi halutha noku ehama omuntu. Olutu lwanakusa nalu fumbulwe mo lu falwe komakonaakono opo ku monike osheetithi sheso, nahe yokaana wo okwa pumbwa okukonaakonwa [ombuto],” ta ti ngaaka. Okwa pula ombelewa yetonatelo lyuuthemba womuntu yi ye mo olunyala moshinima shika, ta gwedha po wo kutya nopolisi oya pumbwa oku itula mo.

Christofina Stafanus, ngoka a dhengwa pomutima noonkondo, oku li mumwayinagona gwanakusa. Okwa ti kakele kaavali ye, aakwanezimo yalwe oya li ashike ya uvu onkalo ondhigu ndjoka ya li ya taalela nakusa pethimbo kwa li taku ningwa ehupulitho. Stefanus okwa ti omushiinda gumwe okwa koleke nkene okanona haka ka kala nokufadhuka po okuza megumbo iikando yontumba, ano haka ka holama maandja mushiinda noku mu lombwela nkene ka kala nokukwatwa koonkondo kuhe.

“Esiku limwe okwa li a shuna kegumbo pamwe nomushiinda ngoka a li a thikama he yokanona. Nomusamane okwa ti hoka okanona ke e ka vala ye mwene nota vulu oku ka ninga ngaashi a hala,” ta ti ngaaka. 

Omushiinda okwa li anuwa a pula yina yokanona a patulule oshipotha kopolisi, ashike okwa li a nukile pomutenya kutya ita lopota omushungu gwe ngoka e na uulema. Sho omahepeko gopaihulo ga ende taga hwama, mushiinda okwa li a hala okanona ka ze megumbo lye, ashike he okwa li e ka kutha mo mosikola molwongeyo. 

Stefanus ta fatulula kutya okanona oka tameke oku ehama uuvu wa yooloka. 

He yokanona anuwa okwa tindi oku ka fala koshipangelo, sigo onkalo tayi nayipala.

“Osha li muJanuali nuumvo sho omushiinda natango a li a ka talela po aakuluntu yokanona nokwe ka adha monkalo itaayi nuwa omeya. A kanitha oshiviha, omafufu taga teka ko, nokwa li e na iilalo. Okwa li e shi pondola oku itaalitha yina yokanona e ka fale kokapangelo,” ta fatulula ngaaka.

Omanga ye li kokapangelo, omushiinda anuwa okwa tumine gumwe gwomaapangi a konaakone okanona ngele oke na ombuto yoHIV.

“Omupya omunene, okanona inaka vula okukonaakonwa oshoka kapwa li iikwa niipangitho esiku ndyoka. Okwa li ashike a pewa omiti ee ta tumwa kegumbo. Ashike onkalo oya ende tayi nayipala,” ta popi ngaaka.

Komatango gesiku ndyoka, omushiinda okwa li a dhengele oambulansa koshipangelo shaKongo opo ya ile okanona pegumbo. Otaku popiwa aakuluntu yokanona ya tindi okuya pamwe nako moambulansa noya thigwa megumbo. Stefanus ngoka a li puukamba wopopepi okwa li a yi pamwe noambulansa koshipangelo.

“Koshipangelo otwa li twa thiki ko lwopotundi 19h00 nokwa li a falwa ko-ICU nokwa li a hulitha lwomokati kuusiku,” ta gwedha po ngaaka.

Mekwathelo lyaKansela gwOkongo, otwa li twe shi pondola okulopota oshipotha shika komukuluntu goshitaasi shopolisi ashike kape na ngoka e tu galukila sigo oompaka,” ta fatulula ngaaka.

– fhamalwa@nepc.com.na