Hilma Nakanduungile
OSHIKUNDE - Aagundjuka ye li yatano moshitopolwahogololo shaShikunde mOhangwena oya pewa oonzapo oshiwike shika, konima sho ya mana omadheulo gokompiuta poPrimaskola Sakaria Nghikembua, tayi adhika moshikandjolongo shaHakafiya.
Mbaka oya pewa oonzapo konima sho osikola ndjika ya pewa eyambidhidho lyookompiuta dhi li 20 momumvo 2020 ko-FNB Namibia, ndhoka dha nuninwa okuhumitha komeho eilongo lyaalongwa nosho wo okupupaleka onkalo yaalongi shi na sha nomakwatathano gopaungomba.
Elelonongelo lyoskola olya tsu kumwe opo aakalimo yopomudhingoloko unene tuu aagundjuka nayo ya makele ko wo kiiyimati yomakwatho ga pewa oskola.
Shika osha ningwa pamukalo gwokugandja omadheul o gopetameko oshali, ge na sha nokompiuta, moopolohalama dha yoolokathana.
Sho a popi poshituthipito, omukuluntuskola, Junias Ngh ishoongele okwa ti , enenelalakano lyomadheulo ngaka olyo okutaandelitha ontseyo yokulongitha iikwakompiuta, opo mboka ya mono omadheulo ya vule okwiithikamena po nokweendela pamwe nethimbo ndyoka tali pula omuntu a kale e na ontseyo yiikwakompiuta, a vule okwiimonena uuyelele nomayakulo ga yoolokathana okupitila komalungula.
“Onga oskola, katu na ashike oshinakugwanithwa shokulonga aanaskola yongula, ihe otu na wo oshinakugwanithwa shokukwashilipaleka kutya otwa lundulula oonkalamwenyo dhaakwashigwana mboka ye li momudhingoloko gwetu, sho osho she tu tulitha miilonga omadheulo ngaka,” Nghishoongele ta ti ngaaka.
Ta tsikile ko ta ti, uuyuni sho tawu ende tawu humu ko, osho wo nomalunduluko tage ya, naanyanyamagulu otaya pumbwa okukala nontseyo yokulongitha iikwaungomba opo ya ninge omakwatathano.
“Omadhewulo ngaka otaga tsikile. Omathimbo kamale sho kwa li aagandji yiilonga ya yoolokathana taya kutu, moka oonakuninga omaindilo ya li ya pulwa opo ya ninge omaindilo gawo pamalungula. Shika osho shimwe shomwaambyoka ye tu thiminike opo tu dhewule aagundjuka yetu, neinekelo kutya otaya ka ninga omalunduluko moshigwana,” Nghishoongele ta ti ngaaka.
A popi wo poshiindingili, kansela gwoshikandjohogololo shOutapi, Immanuel Shikongo okwa holola euvonayi lye, sho yamwepo yomaagundjuka monena taya longitha omalungula pambambo.
“Otu na oshigwana tashi kanitha omikalo noonkondo, unene tuu aagundjuka. Yamwe otaya longitha omalungula okungushulula uukwashigwana. Uutekinolohi inau tu kutha ohokwe yokukala tu hole oshilongo shetu. Uutekinolohi inau tu kutha wo ohokwe yokwiiyambela oshilongo shetu miinima mbyoka tayi eta ehumokomeho.
Omalungula naga longithwe miinima mbyoka tayi tungu, ngaashi okukonga oompito dhiilonga, pehala lyokutukathana,” Shikongo ta kunkilile.
Omu t a l e l i gwe l on g o moshikandjolongo shaHakafiya, Linea Joel okwa tsu omukumo aagundjuka mboka ya mono omadheulo opo ya longithe ontseyo ndjoka ya likola okwiihumitha komeho nokweeta po oompito dhiilonga.