Pinehas Pinehas

!Âubasensa !oagu ǀhûhâsigu ǀhuru!hanaga !norasa tsî !gâiǂâuhâ sîsenǀgaub !nâ nî hâs ge, xawe gu ge !nāsa ǀhuru!hanaga ǀAeǁgams !nâ ǀgôan tsî kaikhoen tsîn hoan !aroma a !norasao!nâ tsî nēsi ǂkhawadīb ǁaxasiga !khō!khōs !aroma ra sîsenūhe. 

Nē tsâsigu ge ǀhûǀguisase !nāsa ǁanǂgāsaben dana!ās !nâ tsî ǂnamipeb !nâ hâna xu gere ǂoaxa, ǁnāpan ǀAe-gams !Ā!khōmais xan aoxūhe hâ khamatsâ mâsiba gere mîse. 

New Erab ge ǀnîkhamikō ǀǁanǁguigu ǁga ǂoa tsî ǀhuru!hanagu hâ!nâ mâsiga mû!hara tsî ǀhûhâsigu khoena xu -ǁîn di tsâgaugu nē ǀhuru!hanagu di mâsigu ǂnamipe gere ǂan ǂgao. 

ǀHûhâsigu ǁanin ge aoǁguiga gere mā, mâti gu nē ǀhuru!hanaga a dī-unuhe ǁkhā tsî -ǁîn !aroma !gâi sâsa tsî !gâi!gâisen!khaib ase a ī ǁkhā !khaisa. 

ǁAnǂgā-aon di ǀguib, 27 kurixa Linekela Naukushub hîa gere mîba, kaise i  ga !gâi hâ !khaisa, ǁîn tsîn ga Donkerhoek ǁanǁguib Katuturas dib !nâ ǀhuru!hanaba ūhâsa.  Nē ǀgaub ain ge ǁ-în ǀhûhâsib ǀgôarona ǀgūse ga ǀhuru hâ, ǁnāpan nau -ǁanǁguigu ǁga ra ǀhuru!gû tsîn ǁgûna ǁîn !aroma ǂâiǂhansendi ǀkha ra hâs xa. 

ǁKhā ǁanǁguib di ǁanǂgāsabes, Petrina Mutumbulwas tsîn ge Naukushub ǂâiǂhansensa !khō!gâ tsî gere mî, ǁîn !aruǀî ǀhuru!hanaga kurubahegu hâ !aromasa noxopa !khōǀgara hâse mû!ā tama hâsa, ǂguros hîan ge !norasase ǁnāpa gere hâmâ tsî ǀgôarona !aob ose gere ǀhurus ǀkha i kara ǀgoweǀnōheo. 

!Khaigu ge kaise a ǀuixa tsî ǂkham ǀgôarona ǂaidi ai ra tsûtsû tsî ǀhurus ǁkhoaba xu ǂoa kai. 

ǁAnǂgāsaben gere mîs ge, ǀhuru!hanagu noxopa ǀhûhâsigu khoen !aroma a ǂûǂûxa !khaisa, !gōsase ǀgôan tsî ǂkhamkhoen !aroma in tā  ǂauxûib tsî ǀhubuǀhubusenxūna hîǀhurus ǀkhāb ǁga ǀgui !oa tamas ka i o !gâi tama ǂkhawadīb ǁ-axasin !nâ nî !âse ī. 

ǀAeǁgams !Ā!khōmais mâisan ge nē ǀhûhâsigu ǂâiǂhansendi ǂnamipe ra !gû dîde nē ǂhôaǂkhanib xa ǀgam wekhen !kharu hâse ge sîbahe xawe noxopa !ereamoa tama hâ.