KAIǁKHAES – ǂGui biljunmaris di projeks ǀAeǁgams tsî Kaiǁkhaes daob dis ge nēsis kōse 300 sîsenga ǁanǂgāsabena ge ǂnuwiba. Daogu ǂGaeǂguis (RA) Dana Sîsenǂuira Mâisab (CEO) Conrad Lutombib ra mîsa !oas ge nēsa ǁîn ǀaweǁguib ǁgūbas !nâ ǁkhāsigu tsî !ēde mā!kharus !āǁîn !oas ase ra sîsenǂuihe. ǂHôamāǂuis !nâb gere nē projeks di dītoasa 11kilometergu, Omakundes tsî Gross Barmens hâra ǁaegu hâba ǂoa ge wekheb Denstaxtsēs ai ǂhanusise gere ǁkhowa-am soab ai ge mî, 300 sîsengu ge nē projeks di ǂguro tsî hakaǁî !harora !nâ a ǂnuwihe !khaisa.
“Nēti ī !nôa daob projekn ǀkhats kara kō, o da ge ǁkhāti ǁkhāsiga mā1kharus !âb ǁgas tsîna nî kō tsî mâtin !āǁîna nēti ra hā nēpa !kharaga !ēna xus tsîna ra domdoresa,” tib ge ǁîba ge mî.Lutombib ge ge mî, RAs ge nēsis kōse N$2 biljunmarisa nē projeks ai māǂui hâsa, ǁî daob hîa go nēsi Omakundesa xu !kharu tsî Gross barmens ǂgâ-ams kōse a sī tsî !âubasenhe rasa !oa Kaiǁkhaes !nâ !goaxa kurib !Khaitsâb !nâ nî !khoeǂgâse.
“Nēs ge ǁkhāti projekdi sîsenga n ǂnuwis ai ǀgui !ammâisa tama hâ, xawe da ge ra mû ǂgao sida Namibiaǁî kontraktern tsîn nēti ī kai projekdi !nâ !âsa xu ǂansa ra hō tsî nēs !nâ-ū naun ǀkha SADC kharib !nâ kai projekn !aroma nî ǀnûgusa. Nēs ge a sida ǀawe-ǁgui RAs ase da Namibia-îna hoa !harigu ai tsî hoa !kharaga !ân sida projekdi din ai nî ǁāǁāsa.
Nē daob ge ǀgam !nariǀkhākha xu haka !norasa !naris â-i !nari!gangu ǁga ge ǀgapiǀgapihe.
Nē sîsenni ge Otesa ti a ǂansa !hū!nāsi ǂnûiǂgās tsî Italieb ǂharugub hîa Cooperativa Muratori Cementisti Ravenna ti a ǂansas hâra xa ge dīhe.
Otesas ge 60%gu sîsenna nē projeks ūhâ tsî Muratori Cementisti Ravennasa 40%ga.
ǁNā !âb hîa ǀAeǁgams tsî Kaiǁkhaes daob hîa 2016ǁî ge ǂnāǁnâba dītoas xa !gau hâb !aromas ge Rasa N$3 biljunmarisa noxopa nî māǂui. ǀAeǁgams – Kaiǁkhaes daob xōkhās ge Rasa sao ra daogu ǀkhas tsîna a ǁaxa ǀAeǁgams – ǀAnes, ǀAeǁgams-Hosea Kutako Anikuniǂgās, !Gomenǁgams-Tsoaxubams, Omuthiyas-Ondangwas tsî Ondangwas-Oshakatis hâga hîa !goaxa kurib !Khaitsâb !nâ nî dītoahese ǀaweǁguisaga.
Daogu ǂGaeǂguis ge N$15 biljunmarisa 2026/27 kurib kōse daogu !aroma ǀawe-ǁgui hâ. Nē N$15 biljunmaris ge Daogu Maris Administrasis (RFA) !nâ-ū ra māhe.