ǀAEǁGAMS – Ministers ǂUrusib tsî ǀHûhâsi !Oabadi dis, Dr Esperance Luvindaos ge ge ǂanǂan, ǀorodomman ge 50 ǀAeǁgams !Ā!khōmais ǀAwa!namn, 150 Namibiab ǀAwa!namn tsî 75 !Khō-omdi mâisan tsîna a ǁkhāǁkhākhâihesa, danaǀaen ǀkha !gaeǁaresa ūhâ mâsin ǀkha nî huiba māse. Luvindaos ge nēsa ǂoa ge wekheb di Wunstaxtsēs ai Parlements !nâ ge mî, ǁnāpas ge dîdi hîa ge 2025ǁî kurib di Danaǀaen ǂHanumā!âs hîa ge ǀgūǁae a aoǁguihes ai ge !ammâisa ide gere !eream soab !nâ. 

“Ministeris ǂUrusib tsî ǀHûhâsi !Oabadi dis ge !kharagagu ǁkhāǁkhākhâide !gao!gaob danaǀaen ǂurusib ǁkhāsigu, danaǀaen !aroma !âide dīs, ǂâiǂhansendi ǂnamipe hâ ǂguro huib tsî danaǀaen ǂnamipe ra hâ ǂōǂōsib mâsiga mûǂam ǁkhās, aiǁgause !khaub mâsib !nâ hâ tsî ǀgaisa ǁaib xa ra !khō!namihe ǀae-aon khami, ǁîna sâsasib ǁga ra oahā-ū dīǀgaugu ǀkha ǀae!khō hâna ge dītoa. Nēs !nâ ge !khōǂgāsa in ge ǀAeǁgams !Ā!khōmais ǀAwa!namn, Namibiab ǀAwa!namn ǀHûs tsî !Khō-omdi mâisana. 

Ministers ge mîs ge, ǁîs ra ǂan!gâ nē ge ǁkhāǁkhākhâide a !khō!oa mâisan !gôab noxopa a ǀoro !khaisa, xawes ǂans tsî ǁkhāsigu hîan ge ǁkhāǁkhākhâis !nâ a !khō!oana, ǁîna ǁnā ǁkhāsib nâ ra mâisa, ǁîn di tsūdī-aona danaǀaen mâsigu !nâ huis !aroma. “ǂHâǂhâsa a !khais ge ǂan da nîsa, nē ǁkhāǁkhākhâidi ge a dīhesa, mâisana ǂhâbasa !harib ai ǁāǁāsa, ǁîn di !khōsaben hîa ǁnā mâsigu xa ga !khō!namihena nî ǂhanu ǀgaugu !nâ ǀae!khō tsî kō!gâse,” tis ge ge mî. 

ǂNûǁnâiseb ra ǀam!gû soab !nâs ge, Ministers !Hū!nāsi ǁHōn, !Hūb !nâ ǂGâ tsî ǂOas, !Norasasib tsî ǁAwosasib dis, Lucia Iipumbusa ǁnāpas ge Parlements !nâ ǁîs di mîǂgāba danaǀaen ǂHanumā!âs ǂnamipe gere mā soab ai ǁîs di ǁkhoreb, in ga ǂhanub tsî ǂhanu-aisib mâisana ǁkhāǁkhāǂuide a !khō!oasa ǁîn ra !nāsa ǁaeba ǂauna !gôab di khoen nē danaǀaen mâsigu !nâ hân ǀkha sîsen xui-ao. Iipumbus ge mîs ge, 4 500 !khōsabena xun ǁaupexa 671 khoena !kharaga danaǀaen mâsigu ǀkha hâsa hîan mâisana nî mûǂamse ina. –Nampa