Namibiab ǀawa!namn ge N$206 miljuns ǁkhāsiba !khōǂgā hâ kokain-e ǂoa ge wekheb Donertaxtsēs ai ge ǂhuwiǂui.
Nē kokainn ge 2018ǁî kurib di Gamaǀaeb !nâ !Gomenǁgams !nâ a ǀhanahe kokainn di ge i, tsî ǁnā ǁhōb go nēsi a !gûǀam soab ai go aoxūhe.
Nellius Beckeri, Forensise Ôa!nâdi ǂNûiǂgās di danab, ge ǂhâǂhâsasib nēti ra !ûǂamaona xu ǁgauǁgaudi ase ǀhanahe xūn nî ǁaeb ai aoxūhes disa gere ǀgonǀgon!gao, mîb geresen nē xūna ǀhôakaose a sîsenūhe ǁkhā tamas ka i os tsîna ǀūsase a bē ǁkhā amaga.
Hāǀaro raseb ge nē ǂnûiǂgās di !ereams hîas ôa!nâde ǀhubuǀhubusenxūn ai dī, ǁîn !khōǂgāba !oe!ā tsî ǁîn di hîǀhuruhesa nî ǁkhaesa.
Beckeri ge ǁîb di ǂâiǂhansensa ǀawa!namn di !âsa ǀhurus ǁnāti i ǀhubuǀhubusenxūn ǀkha ra !gûǁare ǁaxasin !nâs ǂnamipe tsî mâtis nēsa ǀhûhâsib ǂgom!gâba ǂhanu-aisib mâisan !nâ ǁgaise ra tsâǀkhā ǀgaus tsîna.
Hoan !gâ-aib ge nē mâsiba, !gâi tama sîsenǂuiba ǀhubuǀhubusenxūn ǀkha a !gaeǁaresa ǁaxasin di tsūdī-aona !khōsis !nâ ūs tsî ǁnâu!gâ tsî ǀgora!gâs ai ūhâ.
“Sada ge ǀguipa māǀhao tsî nēsa nî !khamǂui. Nē mâsib ge mâ khoe-i hoa-e a tsâǀkhā ǁkhā tsî kaise a !hau!hausa, sada ǀaokhoen tawa i ra ǀkhī o,” tib ge ge mî. Beckeri ge noxopa ge mî, ǁgausen-i rasa !oa di ǀnî Suid Afrikab !hūǀgorade kaise ǀhubuǀhubusenxūn ǂnamipe ǀkhamasa !hâuga ra ǂgaesa in tā ǀhubuǀhubusenxūna ǁnāpa-ū !kharu.
On nēsi ǀhubuǀhubusenxūn ǀkha ra ǂharugu khoena ra dīs ge, aiǁgausen ge nēsi !Gomenǁgams huri-ammi !nâ-ū ǀhubuǀhubusenxūna !hūb !nâ ra ǂgâxa-ū.
Kaise i ge a ǂhâbasa, ǀawa!namn hoaǁae ǂkhaigari hâ tsî ǁaeb ai ǁnān hîa ǀhubuǀhubusenxūna ra ǂgâxa-ūn ǀkha ǂhanugu !oagu nî sîsen !khaisa.
Nē go a ǂhuwiǂuihe kokainn ge!Gomenǁgams di ǁanǂgāsabekha, Grant Nobleli tsî Dinath Azharhâkha, hîa ge kokainn ǀkha !khōsis !nâ a ūhekha di ge i.
ǁÎkha ge ǁaupexa N$206 miljuns ǁkhāsiba !khōgā hâ, 412 kiloxramgu di kokainn ǀkha !Gomenǁgams !nâ 15 Gamaǀaeb 2018 dis ai !khōsis !nâ ge ūhe.
Nē kokainn di kontaineri ge Brazilla xu ǁHuiǂgaeb !nâ-ū !Gomenǁgams huri-ammi !naoǁhôas tawa ge ǂoaxa.