Chevla Wells 

ǀAeǁgams !Ā!khōmais (CoW)ge ge ǂanǂan, ǀgaisa ǀnanub hîa 17 tsî 21 ǀKhūǁkhâb 2025 dis ǁaegu ge ǀapib ge Gammams ǁKhō!hanab ǀhowade ǂkhôadī tsî daogu mâsiga hoaragase ǀAeǁgams a ǂhabase a ǁgaiǁgai !khaisa. 

“Nēs ǀkha da ge aokhoen hîa ǁîn ǀnamsabena nē ǁkhō!hanab tawa ǁguiǂgā hâna ra ǂgan, in ǁnāpa sari tsî sī kō mâtikō ǂkhôab hâsa tsî ǂhâbasa i karao, o !gâi!gâi!nâs sîsenga dīs aiǂhomisende dī,” tis ge ǀAeǁgams !Ā!khōmais ǂanǂansa ra khomai. 

Ai!â ra mîhes ge in khoen hîa ǂkhôahe hâ ǀhowadi !aroma ǂkhâ!nâsa nî ǂhâbana CoWs di ǁKhōdi tsî Sorode ǂHuwis !Âb ǀkha ǀhaoǀhaosen. 

ǁKhātis ǀAeǁgams !Ā!khōmaisa ra ǂan!gâ !khais ge, ādi daogu !nâ go ǀarosensa ai!gû ra ǀnanub mâsib xa ra !aromahese tsî nēs ǀkha daob !norasasiba auto!nari-aon tsî ǀnū!gû-aon !aroma !gâi tamase ra tsâǀkhā !khaisa. 

“Sida !kharaga !nandi ge ǂōrisase ǂkhôahe hâ daoga ra tsēkorobe !hara tsî ǁaerob ǀguiba nî hâse, aibe sîsen daob ādi !napade ra dī in nēs !nâ-ū !norasa !naris ǁkhāsiba īǁkhā kai,” tis ge ǂanǂansa noxopa ra khomai. 

Nausab, hâhâ nî tsî ǂgaoǀkhāsa !harib ai nē ǂkhôahe hâ daoga hā-ūs di sîsenxasib hîa bitumen-e nî sîsenū!nâheba, ǀnanub ǁaeb ga !gû-ī o ǀgui nî tsoatsoa-ūhese ī îb tā sîsenni a ǁaxa-ūhe hîa !khom!nâde hâga. 

Auto!nari-aon ge ra ǀawemāhe in ǂause tsî daob mâsiba ǂâis !nâ ūhâse !nari tsî hoaǁae ǂkhaigari hâ, !gōsase ǁnā daogu hîa ǀnanub xa ǂkhôahes !nâ kaise hâgu ai. 

“Sa !nū!nâxasib tsî sîsenǁareb nau auto!nari-aon tsî ǀnū!gû-aon ǀkhab ge CoWs xa ǀgapise ra !gôa!gâhe, ôa-am da ra nē daoga !norasa tsî !gâi sîsenūs mâsigu !nâ oahā-ūsa ǁaeb !nâ,” tis ge nē haisi-amsa gere ǀam.