ǂNŪǂGOAES – ǂHarugub !nakaǂnôa ministers, Verna Sinimbos ge ǁanǂgāsabena gere ǂgan, in kaise ge !gomse a hā !hūb!noras tsî !gâi!gâna !gôa!gâ. ǂGuin ge ǁîn di ûiga nē !norasasib !aroma a ǁguiba !khais ge ǀgapise nî !gôa!gâhe, ûib !nâ nētsē noxopa hâ khoeda !norasa ra ǀamma amaga. Sinimbos ge ǀgūǁaes ge !Garibams di ǁhûi!nâǂharisa sari hâ i tsî ǁnāpas ge !onkhaohâse gere tsēdīhe !Hūb!noras di ǂâiǂâisen tsēs di ǁâudīb !nâ gere am!nâxa soab ai nēsa ge mî. “Nēpa da sada nētsē mâpa xu da !goaxa tsî mâpa nētsē hâsa ra tsēdī ǁaeb ai da ge hoaǁae nî ǂâihō, sada !gari-aogu tsî !gari-aodi tsîn ge nē !hūb di !noras !aroma ûiga a ǂoa!nâ !khaisa tsî di ǁîn di gagadi !norasasib tsî ai!gûs dide noxopa hâsa,” tis ge Sinimbosa ge mî. Ai!âs ge noxopa ge mî “Tsēdīs, Namibiab di !gûs !noras daoba xu nēsis kōse !norasa !hūb ǁanǂgāsabeda ases ge !ēs ase nî mûhe hîa da nî kō-oa ǁîs di !khūhâ !nae!khaisa, !gôa!gâ !gom mâsigu tsî dande tsî ǀams ai ǁîs di !goaxa ǁaeb di !gâi mûǂuiga !gawasa.” ǂGiǂgomâisas ge ǁhao-aona ge mîba, !norahâ !hūb di ǁaeda aseb sada !hūba ǂgui !harigu !nâ !gâina sī!nâ hâsa, ǂgaiǀons ai demokrasis, ǁgau!nâs, ǂurusib tsî sâuǁkhāsib omkhâisens !nâ. “Namibiab ge !gôasiba !auga!hūsi ǀhûhâsiga xus tsîna ra ǀama tsî ǁîb ǀkhāba xus tsîna ǂkhîb tsî !norasasiba !khōǀgaras di ǁgūtsâde ra dī tsî ǁkhāti kharisises tsîna ǀgaisa tsî !gâi sîsenǁareba ra mā,’ tis ge Sinimbosa ge mî. !Garibams ǁga ǁnaeǁgau tsîs ge ǁîsa ǁhao-aona ge mîba “Nē !ās ge !noras ai!â supuse ge sarihe tama hâ i !āsa. !Garibams ge ǀō-aisase ge nau !âga xu ǁaraǂuisa i tsî mains sîsenaon tamas ka i o ǀō-aisa !aromaiI permetde ge ūhâ in ǀguin !aroma ge hâ i,” tis ge ge mî. ǁKhātis ge nē !ēsa sîsenū tsî ǁanǂgāsabena ǁhûis !aroma xoamâisens ǂnamipe gere ǂgaoǂgao!nâ.