ǀAEǁGAMS – ǂHâsib ge hâ ǂanǂui tsî ū!oasa ǀgui mûǂuiba Namibiab di ǁgan-i ǂharuguba !hūb nî!gâi!gâs kara tsî !khōǀgara ǀnûgus !gâi!gâba goma/ǁgan ǂharugubas karao.
Meatcos di Sîsenǂui ra Mâisab, Vekuii Rukorob, ge ǀgūǁae ge hâ i Goman ǂnamipe ǂAnsa ǀGoragus Tsēs ai nē tsâsiba gere gowaǂui.”Sada ge nî ǁkhāǁkhāsen ǀguipa mâǀhaosa tsî sîsenǁaresa îda nēs !nâ-ū Namibiaba gomaǁgan ǂharugub di ǀnûgus ǂharugub !nâ ai!hūba ǁam kai. Tsî tā da ge nēsis kōse da ǀnai sī!nâ hâna nî aoxū. Sada barden ǂurusib !haros tsî !narisa bardenna hō-oas sîsenǀgaukha ge nî !khōǀgarahe, !gôa!gâhe tsî nî ǂkhâ!nâhe,” tib ge Rukoroba ǁnāpa ge ǁaupexa 80se ǀhao hâ i ǂgari-aona ge mîba. ǂÂibasens nēti ī Goman ǂnamipe ǂAnsa ǀGoragus Tsēs dis ge gomaǂgari-aona ǀhaoǀhaosa in ǀhûhâse ǂan-tsî-hō!âde ǀgoragu goma ǂgarib ǂnamipen ūhâde sada !hūb !nâ. Rukorob di ǁkhauǂuis ge ǁîb gowaǀîs hîa ‘Mâtib Namibiaba goma ǂharugub ǀnûgus !nâ ai!hūba nî !khōǀgaras’ ǂgaiǂams !nakab ǂgari-aona nî gowaǀîse ge hâ i.
“Tita ge ǂâi tama hâ sada ǀnûgus !gâi!gâba ūhâsa. Tita ra ǂâi o da ge sada ǁnāti ī !haros !nâ mâ, kō-oa da nîsa mâ ǀgaugu ai da nî ǀnûgus !gâi!gâba ǀgūǀkhāsa, mâ gaub aid a nî !khōǀgaras di dîs xa,”tib ge ge mî. Hoarahūs ǀgaub mâti da nēsa nî dīhōs dib ge aitsama ǂharugub !nâ ǁgoe, ǂgari-aose mâǀhao tsî ǀgui mûǂuiba hoada !aroma hōsa gomaǁgan ǂharugub !aroma. “Sada ge Namibiaba ǀgui gomaǁgan ǂharugub ase, ǀgui tsurib !kharaga !âga ra !hûǁareb ase nî mû. Hoa !kharaga ǂgari-aon ge mâ-i hoa-e ǁî-i mûǂuiba nî ūhâ tsî -ǁî!nāpe ǂkhâ!nâgu, tsoatsoas ǂgarib disa xu ǁnā ǂgari-ao-i nî ǂaira ai mâbasen tsî ǁ-î-i di gomana ǁamaxus kōse hā-ūse,” tib ge ge mî. !Aruǀîb ge Rukoroba gere mî, nēsis kōsen nē ǂharugub !nâ!âǀhuru-aona hâsa !haese nau ǂgari-ao-i tamas ka io !âba !oa ǀkhunuba ra ǁnaena xūn ga ǂhanu tamase ǂharugub !hûǁares tsurib !nâ nî !gûs karao, ǁ-î!nâpe hui!nâgus soas !nâ.
Namibiab ǁga da nî ǁîb a !uru ǂharugus tsurise nî kōs kara os nēsa ra ǂâibasens ge mâti da nē sîsenǀgauba noxopa nî !gâi!gâi!nâsa, tib ge Rukoroba ge mî.
“Meatcos ge, ǁîsa ǂā!haragu !âba nē tsurib !hûǁares !nâ tani hâb ase, ra dītsâ ǂganǀgauga sī!nâhe ǁkhāse !khōǀgarasa. Sida ge hoaǁae ra ôa-am !nao!nās taniǁkhāsib ū da hâb disa !ûisen tsî ǀgauga hoaǁae !gâi sîsenǀgaub !nâ ūǀgarasa nau ǂgari-aona ǀomkhâis !ēde mās ase.” Nē ǀgaub sida ra sîsenna nau ǀkhāb ǂgari-aon diba xu ǂkhâ!nâsa hō ib ra? Ûiǀgaugu !kharaga gomaǂgari-aon dib ge ǂharugub âna ra !hū!nomasi, xawe gu ge ǀhapinûiǀkhās di ǀkhunuga naun -ǁga ǀgui ra ǁnae tsî ǁîn di khao-oas mâsiba nē tamas ka io nau-i tsurib !nâ hâ-i xa !aromahe hâse ra ǂoaxa.
“A da sao ra dîde kaise ǂhau!nâse !ereamsen re. ǂHâbasasiba hâ-e Land Cruisers ǀkha ta nî ǂgarisa ti ǂgari!nâ kamka ta ga !gâise mâsib !nâ ūhâǀgaras xa dāhe o? Nēsa ǀnîsi ra ī, ǀkharati xūna dīsa ta ǂâi tama xui-ao?” tib ge ge dî. “Sada ge ǀgui mûǂuib ǀkha da ǀgui ǀnû nî hâs kara o !khōǁôagu tsî !gâiba hoatsama sada !hūb !nâ ǀamma ǁkhā, tib ge ge ǀamǀam.