ǂNŪǂGOAES – ǁKharas ǀkharisi mûǂamaos, Aletha Fredericks ge ǁkhāǁkhāsen!khaib ga a ǀguitikō tsîn ga hoa skolǀgôana ǂhanu-ai !ēs ǁgau!nâs !nâ ai!gûs disa a hō !khaisa.ǁîs gere gonǀgon!gaos ge, ǂhâǂhâsasib, skolǀgôan nî ǂkhâ!nâ ra tsî hoana ra !khōǂgā ǁkhā-khāsens ǂnamipeba māhesa, ǁîb !nân xūna ǂanǂui ǂgaos, ǁkhāǁkhā mâǂoas tsîna ǁkhore tsî nēs !nâ-ū !goaxa ǁaeb !nâ ǁgoaǂuide oresa nî hōba ǀō-aisa khoese nî mâǂoase.
Fredericks ge ǂhanusi ǁkhowa-ams 2024ǁî ǁgau!nâs kurib tsoatsoas dis dib tawa ǂNūǂgoaes !nâ !âǀhuru-aona gowaǀî tsî gere ǀgongon!gao, !âǀhuru-aon di sîsenǁareb ǁgau!nâs di !nonaǁhôabes hîa ǁgau!nâ-aon, ǀgôan tsî ǁgûna !khōǂgā hâs !nâ buruxa !gâi!gâna a sī!nâ ǁkhā !khaisa.
“ǀGuitikō sī!nâhesa !ēde hoa skolǀgôan !aroma ǁgau!nâs !nâ ǁawoǁawos ǀkha da ge a hui ǁkhā ǁkhāǁkhāsens ǂnamipeb nî hoan !aroma ǀguitikō !ēde !gâi!gâba sī!nâs !aroma !khōǂgā !khaisa.
Hoada di !ereamxasib ge ǀguitikō !ēden ǀgôana nî !khō!oasa īǁkhā kaisa ǂâuǀoa hâ ǁgau!nâsa ǁîna mās ase,” tis ge ge mî. ǁîs di khomǂgāb ge ǂoa ge kurib di ǀams !âidi !nurigu di ǂanǂanhes tsî ǁKharas ǀkharib ge 14 ǁgau!nâs ǀkharighu !hūb !nâ hâgu ǁaegu 12ǁî !khais ai !hū!nāsise Namibia Senior Sekondere Sertifikati ǀGapi !Harib (NSSCAS) dib !nâ a ǂoaxasa, ǁnāpab ge 2022ǁî kurib ain ge sī!nâ hâ i 10ǁî !harosa xu ǀgam !harora a ǁnāǁgôas khao!gâ.
Nē kurin ge 350 ǀgôana AS !harib ǀkha !kharusa ge sī!nâ. “ǀGuitikōbe tsî sînǁare!nâhe ra !nonaǁhôabes ge ǁgau!nâs tsî ǁkhāǁkhāsens !nâ a ǂhâǂhâsa”, tis ge ǀkharisi mûǂamaosa !âǀhuru-aona ge mîba.
ǁKharas ǀkharisi ǁgau!nâs direktorats di sîsenaonab gere gowaǀî soab aib ge ǂnûǁkhaeba ra dana ǀkharisi mâisab (CRO), Benedictus Diergaardta ǁîb di ǁkhoreb 2024ǁî kurib !nâs ǀomǂoas, !gâiaǂgaob tsî ǂgui!nâgu ǀomkhâis !ēde ga a hâs diba gere gowaǂui.
“ǀHûǁarebese da ge sada mûmûsa !gâi!gâba ge sī!nâ, !nonaǁî !haros !nâ da Namibia Senior Sekondere Sertifikati ǂAm !harib (NSSCO) dib !nâ 2023ǁî !âidi !nâ !hūb a ǂhabase a sī!nâsa, ǁnāpa da ge ǀgamǁî !harib hîa da ge 2022ǁî kurib ai sī!nâ hâ isa xu ǀgui !harosa a ǁnāǁgôas ga ī xawe.
ǀGūǁae ge a !gaeǂgāhe ǂnûǁkhaeba rases ge hâ!nâ i !haros ǁKharas ǀkharisi ǁgau!nâs direktersis dis !nâ, Jesmine Magermans ge ǁîs di ǂgom!gâba gowaǂui tsî gere mî, ǁîs ge sîsenǁkhābe, ǀguixa tsî !goaxa ǁaeb !nâ !gâiba ra mû sîsenaon xa hâǂnamihe hâ i tsî noxopa ǁîs di hui-aose nî !kharu kaisa. Noxopas gere mîs ge ǀkharisi ǂgaeǂguis komites ǁanin nî ǁgūbadi tsî ǁgau!nâs ministeris mûǂuigu tsîna sī!nâ !khaisa.
Magermans ge ǁkhāti hoa sîsenaona gere ǂgan in mâǀhao tamas ka i on ǁîn di !ereamxasiga sī!nâ tide tsîs nēsa ǀgôan di ǂnû!gaus ase nî īsa.