NDU – Mâsib, Ndama Junior ǂAm !harib Skoli Rundus !nâ mâb, dib ge !khō-oms !nā-omdi didi xa sîsenūhe ǁoa mâsib !nâ hâ, tis ge Namibiab !Hū!nāsi ǁGau!nâ-aon ǀHûs (NANTU) di sekretares xenerals, Loide Shaanikasa ǂoa ge wekheb di Wunstaxtsēs ai ge mî. 

Shaanikas ge mâisan MInisteris ǂUrusib tsî ǀHûhâsi !Oabadi dis din xa ǁnūhe hâse ǁnā skoli di ǂkhari-omn mâsiba sī gere ôa!nâ. Nēsas ge ǂhôamāǂuin ge a !nuri nē skoli di ǀgôan ra ǁaupexa !nona wekhegu di -ǁaeba skoli di ǁgâuǂnamib !nâ  !garo!gûsa, ǁgam-i di !nubusib, khôahâ ǂkhari-omdi tsîǀoa!nāhâ tenks ǂkhari-om ǀurib dis hân xa ra !aromaheses khao!gâ. 

Nē a!nâdi !nâs ge Shaanikasa skoli di ǂgaeǂguis xa ge mîbahe, nē ǀoa!nā hâ tenks mâ ǀgamǁî wekheb hoaba hā ra ǀkhaiǀkhai!nâhesasib hîan -îna khoe-i sîsenūs !aroma ǁkhoaxa tama ti gere ǁgui!āba.  “ǀGam wekhekha ǁaeba-i khoe-e nē tenks nî ǀkhaiǀhesa nî !âu, ǁkhawa sîsenūs !aromas ge khoesisa ǁgaise ra tsâǀkhā.!Khō-oms di ǂkhari-omn tsîn ge nētsē ta nēpa ra !hara tsî mû mâsib ǀkha a ǀgoweǀnōhe ǁoa,” tis ge gere ǁgâiǂuisen. 

Shaanikas ge ge mî, ǁgau!nâ-aon tsî ǁkhāǁkhāsenaon tsîn ge nēti ī ǂuruo!nâ mâsib !nâ a sîsen ka ǁkhāǁkhāsen ǁoa, ǁnā-amagan ge ǀhonkhoena nî -ǁawoǁawo sîsen!khaib di ǂnamipeb nîs tsî ǁkhāǁkhāsens !aromas ai dīǀoaǀoa !khaisa. ǁÎs ge ge mî nē ôa1nâs di !nurib nî ǁîs a ǀgapi beros di ǂgaeǂguis ministeris dis tawa māǁnâhe !khaisa. 

ǁKhātis ge ǁîsa xūn ǁaeb ai nî dīhesa ra !khom!nâ dīǀgaugu ǁgau!nâs ministeris diga gere !haraxū tsî gere mî, ǂgui!nâgu khoen berodi !nâ-ū sîsens kaise gaxuse ra ūsa. “ǁKhaisa ǁkhâga i ge ra ū, ǁgau!nâ-ao-e ǁkhāǁkhā!nā-oms !nâ sī-ūsa tsî ǀgam wekhega ministerisa ra ū ǂkhari-om ǀurib di tenksa skoli tawa ǀkhaiǀkhai!nâsa. Nēti ī xūna da ge mā-am ǁoa, khoesisa ra tsâǀkhā,” tis ge gere !gaesen. 

Shaanikas ge ge mî, 34 kurigu di aitsama mâbasensa ūhâ tsî-i ge a īǁoa ǀnî skoln noxopa tanibāhe ra tenkde n ūhâsa. Ai!âs ge ǁîs !nans ǀkha Sarusungu !Amǁaresa skoli tsî Kaisosi!Amǁaresa skolhâkha ge sari hâ i, ǁîkha tsîn ǁkhā !gomsib ǀkha ǂnôa xui-ao. Kavangob Aiǂoas ǀkharib di ǀkharisi ǁgau!nâs direkters, Christine Shilimas ge ge mî, direktorats nî nē teksa nî !nubu ǁaeb !nâ ǀkhaiǀkhai!nâ ǂnûiǂgā-e !naua!noexase ôasa. ǁîs ge Ndama Junior ǂAm Skoli hîa 1300 skolǀgôana ūhâba, ǁaerob ǀgaiba ge ǂganam, ǁkhawa i nî ǂanǂanhes kōse. –Nampa