ǀAos
!Nona omaridi khoen ǀAos din, hîa ǂkhawusa ûitama ǀgaub !nâ hâ ûitsamaxūn ǀkha ǂgarisa ra dītsân ge !gâi ûiba ra mûǂui ǁnāpan ge ǀgapi ǁkhāsiba ūhâ pirin N$26 000 marisi ǁkhāsiba ūhâna a !khō!oas khao!gâ. !Namiǂnûs ǁHûi!nâǂharis ǀAwemā-aob, Jan Scholtzi ge ǂoago wekheb di Wunstaxtsēs ai nē !nona omaride, mâs hoasa 11 pirina ge ǁkhaeǁnāba. Nē pirin ge disi piridi tsî ǁgōb tsîna ge !khōǂgā hâ i tsî ǀAos di ǂkhari ǂgari !âb hîa ǁKharas ǀKharib !nâ ǁgoeb tawa gere !gûǁnâ. Nē !nona supuse tsâǀkhāhesa omaridi ge ǁîn nē pirina nî !khō!oas ǂgaoǀkhādi ai ra dīǀoase ge ǁgauǂnûiǀkhāhe ǀAos di dana mâisab beros dib xa.
ǁNā ǁkhaeǁnâs ǁaxasib tawab ge Scholtza gere ǁgui!ā mâtis ǁKharas ǀKharisi ǀAwemā!nansa ǁîs di ǀkharisi ǀō-aisa dā!harodi ǀaweǁguib !nâ ‘ǀō-aisa ǁkhāsiba ūhâ pirin’ ǀkha nî ǂgarise ǀAos, !Autsawises, ǀNomsoros Aiǂoas tsî Huriǂoas tsî ǂNūǂgoaes ǀGaro!ā !âb hâna ǀaweǁguiba hâsa nē proxramma xu nî domdorese. Nē proxrammi !nâ-ūs ge pirin ra ǀgoraǂuihesa khoen di ûiǀgauga !gâi!gâi!nâs !aroma. !Hūb!noras khao!gâsa xub ge Namibiab ǂhanuba ǀkhariga ra ǂgaoǀkhā ǁîgu di ǀō-aisa ǀaweǁguigu dā!harodi nî ū!nâhegu tsî ǂûn mâsigu diga nî māǂgāse isa. Mâ guiǀguibe ǀkharib hoaba xu gere ǂgaoǀkhāhes ge projekn hîa ǀgâsib tsî !gâs ǁîn ǀhûhâsigu disa oe-am tsî nî ǀoroǀorona ūhâ tsî ǁkhāti ǂûn nî hâsa ǁawoǁawosa ǁîn ǁanǂgāsaben !aroma. 2013/14î Kurib di mariǂnûiǂuis !nâs ge Ministris Kai!ā tsî !Garo!ā Omkhâisens disa mâ ǀkharib hoaba marisise ge ǂkhâ!nâ mâb hoab ǁîb di ǀkharib ǀaweǁguib dā!harode nî sîsenǂuise nē proxrammi !naka. Scholtzi ge ge mî, ǁKharas ǀKharib ge Boer pirin ǀkha ǂgarisa a ǁhûisa ǁîn ǀaweǁguib hîan ge a māǂgāb !nâ, ǁîn nē ǀkharib !nâ ra ǀgau amaga. ǁÎb ge ge mî ǁîb ǀgaisa ǁguiǂgāsens ǀkha ǀAos ǁanǂgāsabena nî ǂkhâ!nâsa ǂûn nî hâsa ǁawoǁawos !nâ. Scholtzi ge President Hage Geingob di mā!hūsa gere gonǀgon!gao, mî rase “ǀGui khoe-i tsîn ge !âs xa ǁō tide’. ǁNā ǁangāseben nē proxrammi, !Namiǂnûs ǁHûi!nâǂharis diba xu ge a domdoren ge Joseph Josephi, Lydia Witboois tsî Janie Goliath hâna. Nē proxrammi ge noxopa nî ai!gû. Nē ge !khō!oa khoen di ǀguib, 31 kurixa Joseph Josephi ge koasa ǂhanuba nē proxrammi !nâ-ū hâ huib !aroma mā tsî ge mî ǁîb nî ǁawoǁawosa ǁîb pirin nî ôananôagu tsîn nau ǁanǂgāsaben tsîna ǁnāpa xu nî domadresa.