ǀAeǁgams
ǂGuro Ministers, Saara Kuugongelwa-Amadhilas ge ǂoago wekheb Donertaxtsēs ai ge mî, ǂhanub nî N$910 miljunsa sîsenūsa nē khoraǂuisen tsî ra ai!gû ǀkhurub mâsiba oe-am tsî ǁaupexa 600 000 Namibiaǁîn hîa ǀkhurub xa tsâǀkhāhe hâna huiba mās !aroma.
Kuugongelwa-Amadhilas ge nē ǂanǂansa ǁnāpas ge N$1.5 miljuns marisihuib hîa ge Frans Indongob !Nans xa a māhesa gere !khō!oa soab ai. Nē maris ge ǂGuro Ministers beros !naka ra ǁnā Namibiab ǂŌǂōsib Huib ǂGaes !aroma ge māhe ǀkhurub mâsiba oe-ams ase.
ǀNai-i ge ǂguro !âb !nâ N$360 miljunsa ge sîsenūhe, !Hoaǂkhaiba xu ǂKhoesaob 2015ǁî kurib dib !nâ tsî i ge noxopa N$550 miljunsa a ǂhâbasa ǀgamǁî !âb ǂoago kurib Aoǁkhumuǁkhâb diba xu nē kurib ǀKhūǁkhâb kōse ǀkhurub huib !aroma ǁnān tsâǀkhāhe hâna nî huise. Kuugongelwa-Amadhilas ge ǂgansa aitsama mâbasen hâ ǂnûiǂgādi ai gere dī, ǂhanub ra dītsâ ai!gûs !aroma ǀawede ǂkhâ!nâsa î da hoatsama !âsa ǀoroǀoro. “Hoada a ǂanseb ge sada !hūba ǁkhōǁkhōsa ǀkhurub mâsib xa !kharu ge !nona kuriga ge !khōhe tsîb ge !aoba noxopa hâ nē ǀkhurub mâsib nî ai!gûsa hânab ga ǀgaisa ǀnanuba nî hā tama is karao” tis ge ge mî.
Kuugongelwa-Amadhilas ge ǀaro tsî ge mî, ǁîs gere ǁkhore tsî !âubasensa ǂgui !gôab di ǂharugu-aon nēpa nî hâ tsî huiba māsa hoa Namibiaǁîn !nāb !nâ tsēs !nâ xū-e nî ǂgāsa tsî-i ǀgui-i tsîna !âs xa ǁō tidesa. !Aruǀîs ge ge mî, ǂhanub nî hoaǁae dītsâsa hoa !âǀhuru-aona !khōǂgāsa in ǀhûǁare hâse mâtin ǀkhurub mâsiba nî oresa hōbasa ôa-am.ǁKhā axasib tawab gere !hoa soab aib ge Dr Solly Amadhilab, Frans Indongo ǂGaes dib hîa ge ǂharugu-aob Frans Indongob ǀons !nâ gere !hoaba ge mî, Namibiab hoa ǁaegu !nâ ǁîb îbe a ǁkhōǁkhōsa khurub mâsib xa !khōhe hâsa. “Sida Frans Indongob ǂharub dida ge ra !gôa!gâ ǂhanub nē mâsiba oe-ams !aroma ra dīna tsî ǁkhāsib ǂhâbasapa nî hui” tib ge ge mî. Nē huib Frans Indongo ǂGaesa xu go hāb ge nî sîsenūhe ǂnauǁnâsa ǀgaugu ai hâse ǁamas !aroma sao ra !khaigu Frans Indongob !Nans ǀhûǁare!nâ hâ gu tawa, Bokomo Namibias, Tongaat Hullet Namibias tsî Ongwediva Spar hâga.