Uakutura Kambaekua
KAMANJAB – ǁAnǂgāsaben tsî ǂharugu!khain tsîn ge Kamanjab di ǀawemā!nansa N$13 miljun marisa māhe ra !oabadi !aroma surude hâ. Nē maris ge Kamanjab ge !garo!ā !ā!khōmais !harosa a māhesa xu !goaxa.
Nē maris ge 2919ǁî kurib !nâ ǀnai N$5 miljuns ai ge mâ i. Kamanjab di Dana Sîsenǂuira Mâisas, Bianca Nguaikos ra mîsa !oab ge nē surudeba, ǁgam-i dis ǀguisa hî tama hâ, xawe 123 ǀkhuwi-aon Built Together proxrammi din di mâǂoahâ maridi tsîna !khōǂgā hâ. Nē surudesa marisa xus ge N$5 miljunsa 980 surudeguhîas !ā!khōmaisa mātarehe tamagu ǀguiga !khōǂgā hâ, ǁnāpas nau N$5 miljunsa built-together programmi mātaresa tama surudegu dise.
!Gau ra N$3 miljuns ge mātaresa tama !hū!âdi di.
“ǁKhâkorobe nē !hū!âdi ai ra mātarehe maris ge N$150 tsî N$400 ǁaegu hâ tsî 60 ǁkhâgu !nâ nî mātaretoahese a ǂgaekhâisa. Nē !âb ǀkha-i nî toas kara, o-i ge ǀkhuwi-ao-e omsa oms ǂgaoǀkhādi ai ra dīǀoaǀoa,” tis ge gere ǁgui!ā.
ǁKhātis ge Nguaikosa gere mîs ge, ǀawemā!nans ge mîǁguiba a ūsa, mâǂoa hâ maridi ais hāǀaro ra marisa ǀaro tide !khaisa tsîs nēsa surude-aona ǂgaoǂgao!nâs ǁgūbas tsîna ge īsa. Kamanjab ge NamWatersa N$3.5 miljunsa ǁgam-i!oabadi !aroma surude hâ.
“Covid-19 ai!âb ge sida surudeba NamWaters tawa ge !anu i. Sida ge ra ǀaweǁgui, nē surudeba 12 ǁkhâgu ǁaeb !nâ mātareǁnâsa, maris hîa da ǁguiri-aon ai da ra ǁamaxū !hū!âde xu nî hōsa xu,” tis ge Nguaikosa ge mî.
ǀAwemā!nans noxopa ǂnôa-ū ǀgaisa tsûadanab ge, ǀkhaiǀkhāse hîa 1970 kuriga xu ǁgoedi, xawe noxopa ǂhâbasa !oabadi !aroma ǂhomisa tama tsî ǀawemā!nans marina !gâi tamase ra tsâǀkhāde.
ǀNîhâ !gomsib ge, omdi tsî !khaigu hîa a ǁamaxūtoasa xawe noxopa ǀgui ǀgau-i ais tsîna sîsenūs !aroma !gâi!gâi!nâsa tamana, ǁîn ge sida surudeba kaiser a tsûtsû. Nē omn ge 1974ǁî kuriba xu ǀkhai!nâse mâ.
ǀHonkhoen ge a ǀhao-ūhe ǁoa. !Hū!âdi tsîn ge ǂhâbasa !oabade ūhâ tsîs ge ǀawemā!nansa nēpa xu ǀnai !oabadi marina ǁkhâkoroibe nî ǂgaes ge,” tis ge gere ǀaro.
ǂOa ge wekheb !nâ ge Kamanjab !Garo!ā ǀAwemā!nansa ge !khō!gâ, 83 kairakhoen omdi hîa ǁgam-e mātaresa tama surudegu !aroma ge ǁara-aihe hâ ina ǁkhowa-ambasa, N$595 ǁkhawa ǀkhowa-ambahes maris ǀkha. Nē maris ge N$250 ǀoro surudeb !aroma !khōǂgā hâ.
ǀNî kaira khoen ge N$90 000 xa !nāsa surudeba ūhâ, hîan tātsē mātaretoa ǁkhā titeba. ǁÎ-i nî ǁōǂoas kara, os nē marisa nî xoaǁnâhese, “ tis ge ge mî.
ǀAwemā!nans ge 2023/24 marikurib !aroma ǀguis khami ī ǀgapiǀgapi-e dī tama hâ.