ǀAeǁgams
Ministeri ǂNamipeb tsî !Narisarimas dib, Pohamba Shifetab ge ra mî ǁnāpab ǀgaisa ǂhâsiba hâsa taniǀgarahe ǁkhā ǀgauga ôa-ams diba, ǁgam-e khoen tsî sâuǁkhāsib ǁaxasin !nâ sîsenūs !aroma. Shefetab ge ge mî, !nubusib sîsenūs !aroma ǀnai a ǂhomitoasa ǁgam-i dib Namibiab ǂganagab !âb !nâb ra ai!gûs tsî ǀomkhâis sâuǁkhāsib disa !hâumâisa.
“Ôa!nâdi hîa ge dīhe di !oa i ge ra ǁgau, ǁgam-e hōs mâsib Namibiab !nâ !hūbaib ǀgamgu xa ra !aromahese hoaragase nî khao-oasa tsî i ge ǁnā-amaga a ǂhâbasa 2020ǁî kurib !aroma ǀnai gam-i !harib ai aiǂhomisase hâsa. Nē mâsib ge !hūba gam-i di !nubusib !aorosasib !nâ ra mâi,” tib ge Shifetaba ge mî. “ǁGam-i ose da ge a ǀuru ǁkhā sâuǁkhāsib ǀomkhâis xa !hoasa, nēs ge ûib sada dib tsîna !khōǂgā hâ. Namibiab ge ǀgaisa ǂâiǂhansensa ūhâ hoa !hūbaisise ra hō!âhe ǀgammi mâsib ūhâ khao-oa kai ra mâsib sâuǁkhāsib dib ǂnamipe tsî nēs ge a kai ǁgoaǂui !hūb ūhâsa nē ǁaeb !nâ,” tib ge ministera gere !gā!gā.
Namibiab ge !kharese a kurus !nâ ǂnâsa !hūb ase !haese ra tsâǀkhāhe nē ǁkhōǁkhōsa ǀgammi tsî ǀnanu mâsigu xa. Shifetab ge !aruǀî ge mî ǁgam-i di ǀorosib ǀgaisa ǁkhōǁkhōsasib tsî !aoba !hūbaib, khoesib, kurus xūn tsî ûitsamaxūna !khōǂgāba hâsa. Namibiab ge gaxuse nē mâsib ǁgam-i !nubusib dib tsî ǀkhurub dib ǀkha !goaxa. ǁGam-i !nubusib ge ǀgaisa ǀgammi xa ra !aromahe. Nēs ai mâ mûb ǀkhab ge Namibiaba !gāsase a xoaǁguisa sîsenxoaǁguigu tsî ǀaweguiga ūhâ mâti-i ǁgam-e nî sîsenūhes daoǁguigu ase.
Aiǁgause da ge !Amǂgāsa ǁGam-i Hōxūǁuib ǂGaeǂguis ǀAweǁguiba ūhâ hîa ra ǁgūbaba sada !hūb nî tani ǁkhāsa ǂâuhâ ǁgam-e ūhâs ǁkhāsib tsî ǂnamipeba !ûi!gâs !aromase. ǁKhātib nē ǀaweǁguiba !aruǀî ra aoǁguin ge !kharaga ǀgaun ǁgam-e da a sâu ǁkhāna, aiǁgause ǁkhawa sîsenūs !aroma ǀnai a sîsenūsa ǁgam-e ǂhomisa maindi tsî xūkuru!khaigu tawa.
Shifetab ge ra ǂgom!gâ, nē ǀaweǁguib ǂōrisase nî !hoaǂamhesa ǂganǀgaub nēs ǀkha nî !gûǁareb ǂnamipe. Green Climate ǂGaes (GCF) ge nē projeksa marisise nî mâba.