ǂNŪǂGOAES – ǂGiǂgosi ǂgaegui-aon ǁKharas ǀkharib din ge aoǁguiba ge dī, ǁōǂoa ge kaptein Hendrik !Nanseb Witbooib !aromab ga !gari-aosi ǂan!gâs ǁauǂui!khaiba Khāxatsūs !nâ a ommâihe !khaisa.
Nē ǂgiǂgosi ǂgaegui-aon ge parlements komites khoesi ǂan!gâs tsî ǀhûhâsi omkhâisens dis ǀkhan ge ūhâ i ǁnâuguǂharugus !nâ nēsa ge dī. Popular Democratic Movements (PDM) di presidenti, McHenry Venaanib ge ǂoa ge kurib !nâ nē !hoaǂam!khaisa ge aoǁgui, îs ǂâiǂâisen!khaib, ǁōǂoa ge auta !Nanseb, Hendrik Witbooib di !gôasib disa, ǀHaiǀgâseb ai omhe.
Nē komitesa !khōdana hâ, Parlemets ǁanis Bertha Dinyandos ge ge mî, nē komites mîǂgāba ǂgiǂgosi ǂgaeǂgui-aon, ǀhûhâsi ǂgaeǂgui-aon tsî ǂhabase ǁgoe ǀhûhâsiba xu ra ôasa, mâpab nē ǂâiǂâisens !khaiba nî kuruhes diba.
!Autsawises di ǁhûi!nâharis ǂgiǂgosi ǀawemā-aob, Jeremias Goeiemani ge ge mî, ǂanǂansaseb ǁōǂoa ge Witbooiba ge !hūb di !gari-ao i, xaweb ǁîba ǁgâu-e xu ǂoaxa hâsa.
“Sida !hao!nāsi ǁnaetigu !oagu, hanats ga ǀgapi !haro-i !nâ a mâs ka xawets ge, ǀgui timî tsîts nî ǁnās karao, sa !hari-aisa !oa nî ǁaru. ǁNā-amagab ge nē !gôasib ǂan!gâs !khaiba ǁîb aboxan ǀae-ais ǂnôapa nî ǂnuwihe.
ǀNî ǁgauǁgau-i tsîn ge ǀHaiǀgâseb, ǁîb tawab ge ǁîb ûiba !hūb di !noras !aroma a ǂoa!nâb tawa a mâihe ǁkhā,” tib ge ge mî. !Namiǂnûs di ǂgiǂgosi ǀawemā-aob, Lazarus Nangolob ge ge mî, ǁōǂoa ge kaptein Hendrik Witbooib !gôasib !aroma nēti ī ǂan!gâs ǁgauǁgausa mâis nî mûmûsa ǁkhāsiba !khūhâ !nae!khais Witbooib dis tsî Namibiab !aroma ǀarosa.
“Nēs ge ǁkhāti nî ǁgau, !hūǁîda ase da !hūb di !noras !aroma ge ǁōǂoa !gari-aona ǀuru tama hâsa.
Ti aoǁguib ge nē ǂâiǂâisens!khaib ga ǁîb di ǁgâu-aris (Khāxatsūs) ais tsî ǁkhāti ǀHaiǀgâseb ai a kuruhesa,” tib ge ge mî.
Noxopa ǁîb mîǂgāba gere māb ge ǂHoas di !Hao!nāsi ǂGaeǂguis ǀawemā-aob, Deodat Dirkseb hîa Goeiemanni di mîǂgāb ǀkha gere ǀhûǀguiba.
Dirkseb ge !khō!gâ tsî gere mî, Witbooib di ǂâiǂâisen!khaib nî ǁîb di aboxan ǀae-ais tawa mâihe tsî ǀoms âb ge ǂoapas osesa.
Witbooib ge ge ǀKhowese Nama khoen di Gao-ao i tsî Duitsern di !gamǂuis ǁaxasibab gere mâ!oase 1900 kurigu !nâ ge ǂansa i. ǁÎb ge 29 ǂNūǁnâiseb 1905 dis ai ǀHaiǀgâseb ǀgūse ge !gamhe tsî ǁnāpa a ǁkhōsa. -Nampa