TSOAXUBAMS – ǁNāti i sorodi, khoen hîa coronas ǀkha !gaeǁaresa ūhâ ǁōn xa !aromahe hâse ge ǁōǂoan didi ge ǀnai !Gomenǁgams !nâ hâ ǁkhō!hanagu !nâ nî ǁkhōhe. Erongo ǀkharisi Mûǂamaob Neville Andre-Itopeb, ge Nampasa ǂoa ge wekheb Wunstaxs aib ge ūhâ i dî!nâǁgamǁares !nâ ge mîba, ǁnā mîǁguib ǀnai hâ !Gomenǁgams !nâ ǁkhō!hanagu nî coronas ǀkha !gaeǁaresa ūhâ ǁōn xa ra ǁō khoena ǁkhōs !aroma sîsenūhes dib ge a ūhesa, ǂhâbasa !hoaǂharugudi ge Ministeris ǂUrusib tsî ǀHûhâsi !Oabadi dis ǀkha ūhe hâs is khao!gâ. !Gomenǁgams !ā!khōmais ge ǁ-îs ge ūhâ i ǂnûs !nâ nē mîǁguiba ge !khō!gâ ǀnai hâ ǁkhō!hanagu nî sîsenūhes diba. “Sida ge ǁnā ǁōǂoa hân di ǀaokhoen tsîn ǀkha ge ǁgamǁare tsîn ge hoana nēs ǀkha a ǂkhîǂâixa. ǀNais ge nē ta ra !hoa soab ai !ā!khōmaisa a ǁaxa ǀhowa-āde aiǂhomis ǀkha,” tib ge ge mî. ǀKharisi mûǂamaob ge ge !gā!gā, ǁnâugudi hîan ge ǂurusib ministeris mâisan ǀkha ūhâ idi khao!gâ i ge a !gāsa !khaisa, hanas ga ǁōhâ sorosa ǂhanu ǀgaub ai nî aiǂhomihes kara, os ǁîsa ǂgaes !nâ ǂgāhe tsî a ǁkhōhe ǁkhāsa, nausas nēsa ǂgurose ge ǁōǂoa khoe-i di soros ǀkha ǂhanuse ge dīhe tama hâ i xawe.  “Hoa sorodi ge nēsisa xu sorodi !aroma a aiǂhomisa ǁgarugu !nâ aibe ǂgāhe tsî ǂgaes !nâ nî ǂgāhe ǁkhōs ai!â tsîs ge nēsa ǁnaetisa ǁkhōs ǀkha a ǀgui. ǀNîkhami kō !gôab di ǀaokhoen tsîn ge ǁîn ǀnamsabe-e ǁkhōsa nî ǁkhao!nâ, ǁnāpan ga ǂgaoǀkhāsa saraba nî ǂgaeǂgās khao!gâ tsîn ge !gau ra khoena !nūseba xu ǁkhōsa a ǁhao!nâ ǁkhā, covid-19 ǁgaraga ra saose. Mûǂamaob gere mîsa !oan ge ǀaokhoen nē ǁōǂoa hân dina ǁnāti ī aiǂhanuba ge māhe in ǁhûi mâ ǁkhō!hanab tawan ǀnamsabe-e ra ǁkhōbahe ǂgaosa î-i ǁnās !oagu aiǂhomide !ā!khōmais xa dīhe. Erongo Reds tsîn ge !kharaga !om!anu-ūxuna ge ǀkhae tsîb ge ǀkharisi mûǂamaoba nē ǀkhaeba erongob ǂurusib direkters Anna Jonasa ge ǁkhaeǁnâ. Standard Banks Namibiab dis tsîn ge ǂûn ǁhōdi hîa N$250 000 ǁkhāsiba !khōǂgā hâdi tsî N$800 000 ǁkhāsiba !khōǂgā hâ sorosa omkhâis xūn tsîna ge ǀkhae. – Nampas