Covid-19 ǁōs ra ai!gû ǁaeb ain ge ǂguina mûhesa tama !khamsa ra !kham hîa ǀnamsaben ǁōǂoadi, ǀguri ǂurus !aroma nî ūhâsense īs, !aob tsî ǂanǁawosasiba ūhâ tama is, nē coronas kaise ǀgaisase ǂkhôaba ra ǁgui tsîb !hūb ǂurusib !âba !aruǀî a ǁkhāǁoas xa ra xāǂgāhese.
ǂAnsaben ge ra mî, !hūb ǀgamǁî ǂurusib ǂōǂōsib mâsiba a hō!â ǁkhāsa tsîb sîsenǂuib nē ǁōs diba a kai ǁkhā tsî ǁkhāti gaxu ǁaeba ǁkhawa !gâi mâsib ase oaǀkhīsa nî !aromasa.
“Sîsenǂuib Covid-19 dib ǀguib ge ǁkhāti hâ tama hâ xawen ge ǂgui ǁgoaǂuina ǂurusiba ra !hâumâise ra hō!âhe. ǂAuna khoen ge sîsenga ge ǂoa!nâ tsîb ge !aoba kaise ge ǂharo. !Aob, ǁkhurisasib !aob xab, !gomsigu xa ǁgâi!gamsase tsâs tsî nau hâ !gomsigu khoe-i danas ǀkha ra sîsengu ge !hūb a ǂhabase ǁanǂgāsabena !khō hâ hîa danaǀaegu di !gôaga !hūb !nâ ra ǂharo kaisa,” tib ge ai!âkam ministeri ǂurusib dib, Dr Bernard Haufikuba ra mî. Dr Haufikub ra mîsa !oan ge, îbe ǀgâsib !nâ hâ khoena ǀgaisa !aorosasib dana !gomsib dib !nâ hâ.
“Nē ǁōs ge ǁaupexa mâ ǀguiǀguibe !hūǁî-i hoa-e tsâǀkhā hâ, xawe da hoatsama a ǂan !khais ge, ǁnān hîa îbe !gâi ûiba ūhâbasens !nâ a ǂkhawusan ra ai!gûsa ǁgaise nē dana !gomsin xa tsâǀkhāhes !nâ. !Hau!hausase ī !khais ge, ǂguin ân nē mâsib !nân hâsa ǂan tamasa.
ǁNā-amagas ge khoena ǁîn ûiga aitsama ǀamǀams !gôagu tsîn ra ǂharosa. Sada !hūb !nâ da ge kaise ǀoro !gôab khoen hîa danas mâsigu ǀae!khōdi !nâ ǁkhāǁkhāǂuisen hâna ūhâ, hîa nē !gomsiba ǁaeb ai oe-ams tsîna ra !gom!gomsa. Hâ a ǀaedī-aon ge !nāsase kai!ādi !nâ hâ, tsî ǁnās ǀkha !garo!ā ǀkharigu a xūǂuisa amaga, kai tsûadanab ase ǂurusib !âba ība,” tib ge ge mî.
ǀAedī-aos, Esperance Luvindaos ge ge mî, ǂurusib mâisan !hūb !nâ hân !nāsase Covid-19 ǁōs !aorosib !nâ tsēkorobe hâsa, ǁîn kaise ǂauna !gôab ǀae-aon ǀkha tsēkorobe hâ xui-ao.
Nē ǂurusib mâisan ge ǂguin âna ǀnai ǀnî hâ ǀaena ūhâ, tsî-i ge supu tama hâ tsēs hoasats 10 xa a !nāsa ǀae-aon Covid-19 dina nî ǀae!khō tsîn ǂguin ân di ǁōǂoasa nî !harasa.
ǁÎn ge ǁkhāti !nāsa !nāde ǀaokhoen âna xu ǀonaǂuisase ra hâ tsî kaise supu tama ûib !nâ hâ,” tis ge ge mî.
!Nakaǂnôa ministers ǂurusib dis tsî ǁkhāti a ǁkhāǁkhāǂuisa ǀhûhâsib !oabadi mâisas, Esther Muinjangues ge ge !khō!gâ, amabes !nâb danaǀaeb mâsiba !hūb !nâ ge ǂharosa.