SIBBINDA – Zambezi ǀkharib ǂgari-aon, !hanagu âna !khā!khuridi ǀkha ge tsoatsoan ge ge mî-gui ǁîn ǀkhuruba a mâ!oa ǁkhā ǂûna ra !hanasa, ǂgaiǀons ai mahangu-i tsî sorghummi tsîna. Kurigu !oeden ge nē ǀkharib ǂgari-aona  !nāsase milina gere !hana. 

Xawen ge ai!gûra ǀkhurub mâsib xa ra ǁgarihese nē khuruba a mâ!oas ǁkhāsiba ūhâse cassava-i, mahangu-i tsî nau !horon hîa !nāsa ǁgam-e milin khami ǂhâba tama ûi!kharus !aroman ǁga ge dawasen. 

ǀGui ǂgari-aos nē ǂgari-aon di ǀguis ge a 40 kurixa Heritha Mafenjehos hîa Nampengu !garo!ās, Sibbinda ǂgiǂgosi ǁhûi!nâǂharis disa. 

Nē ǂkhari !garo!ās di ǀhûhâsib ǁaegus ge ǁ-îsa ǀguixasib tsî !garise sîsens ǀkha a ǁ-axa ǁîs di 6 hektar !hūsa !khā!khuris ǀkha. 

!Khā!khuris !aroma a ǂhâbasa huisenūxūnas a sī!nâ ǁoa, os ge Mafenjehosa ǁ-îs ǀgôan ǀkha mâ tsēs hoasa ǁgoaǂnowos ai khâimâ tsî !omdi !nâ ūn hâ ǂkhariron ǀ ra sîsensoreǂgâ.ǁîs ǂâisa ǂnûi-aihâ-i ge mahangu-i hîa ǀgaisa ǁ-gam-e ǂhâba tama hâ tsî ǀkhuruba a mâdan ǁkhā-e. 

Mahangu-i xōkhās ge ǁîsa watlemunga ra !hana. 

Mafenjeho hâ1nâ mâsib ge ǁkhāti !nā ǂnôa-ū ǁgoaǂuide !khōǂgā hâ, ǀkhurub mâsib tsî sâuǁkhāsib !nâ hâ !nubusin !hanaǂgariba kaise ge !gom!gomsa ra ǁgause. 

!Khā!khuris ǁaeba ra !khō!gâseb ge, Sibbindas ǂgiǂgosi ǀawemā-aob, Mickey Lukaeziba ge mî ǂōrisa ǀaweǁguib a ǂhâbasa !khaisa. “ǀNanuba aimûǀgarus ge ǂguros khami !aruǀî a ǂgom!gâhe ǁoa,” tib ge gere !khâikhom. 

ǂGari-aonab ge gere ǂgan, in !hanaga !gâise aiǂhomi tsî ǂoa!nāsa ǀoroǀoro. 

“Tā gui !nās kha hoa !hanaba ǂgā toa. !Kharaga ǂûna ǁkhāti !hana î ǀgui-e xu ǁnâi domdore, mâsib ga a ǂopa o,” tib ge gere ǀawemātsâ. 

ǀAwemā-aob ge ǂgari-aona gere ǂgaoǂgao!nâ, in tā mâsib xa ǁgarihe tsî ǀûsen. Sîsenū ūts hâ xūrona î ai!gû tsî sa ǁkhoreb tsî -hawosa sī!nâ.”