Samora Machel ǁhûi!nâǂharis di ǀawemā-aob, Nestor Kalolab ge ǂhanuba ra ǂgan, îb ǀgôan noxopa skolna hōbahe tama ǁaeb !aroma skol-e ǀawe in ǁnā 529 ǀgôan Goreangab ǁhûi!nâǂharis !nâ noxopa skolsoa-e ūhâ tama is xa ra !aromahese ǁgâudi tawa ǁgoena huis ase. Kalolab ge ge mî, nē ǁanǁguib ǂharo ra kurikorobe ǁanǂgāsaben !gôagu !oagu !nona ǂam skolgu tsî ǀgui sekondere skoli tsîna ǂhâba hâsa.
New Erab ǂhôare-ao-i ge ǁhûi!nâǂharis beros tawa a mû xoakhâib ǀgôan hîa noxopa skolsoana hōbahe taman dib ge !gao!gao xratsa xu xrat 11 ǀgôana !khōǂgā hâ tsî Kalolab ra mîsa !oa ǀasa skola a hō ǁkhā.
Xoakhâib ge sao rase !gôaga ra ǁgausen: !gao!gao ǁgau!nâs (66), xrat 1 (145) xrat 2 (68), xrat 3 (51) xrat 4 (52), xrat 5 (31), xrat 6 (22), xrat 7 (22), xrat 8 (50), xrat 9 (6), xrat 10 (10), tsî xrat 11 (6).
“Tita ge ǂauna ǂnûde Goreangab ǀhûhâsib ǀkha nē !gomsiba oresa hōbas !aroma ge ūhâ i tsî hoarahus ores hîab ǂhanuba a hui-ū da ǁkhās ge ǁaerob ǀgaiba nî hâ skol-e kurusa, nēsi di ga a tent xawes tsîna, in hoa Namibiab ǀgôana ǀgui aiǂhanuba ǀama ǁkhā tsî tā ǀnîna ǁaraǂuihe,” tib ge ǀawemā-aoba gere ǁgui!ā. ǁÎb gere mîsa !oab ge nē mâsiba ǂoa ge kuris tsîna ge hâ i tsîb ge sîǂkhanisa ǁgau!nâs ǀkharisi berosa !oa xoa tsî ǂam skol-i tsî sekondere skol-i nē ǁanǁguib !aroma a ǂhâbasa !khaisa ge ǁgui!ā, xawe nētsēs kōse !eream-e !khō!oa tama hâ. “Nē !nubusib skoln dib ge ǂâiǂhansens ase sida ǂgaeguis tsî ǀhûhâsib Goreangab diba ība, ǂgui !gôab skolǂgâ ra ǀgôan nē ǁanǁguib !nâ ra doeǂgâxa amaga. ǀHûhâsib ǁanin ge ǁîn ǂkhîo!nâsiba ǁkhāti ra gowaǂui, ǀnî ǀgôan kaise !nūse ra skol!gû, skoln !nubusib xa ra !aromahese !khais ǂnamipe. Nē ǀgôan ǂkhawadīb tsî ǀnî !aorosa mâsina tsēkorobe ra !kharu!nâ hîa,” tib ge ǀawemā-aoba noxopa gere mî.