Lahja Nashuuta
!Hū-o !hūǁîna hâ!khaimas dīǀgauga ǁkhawa kō!gâs ministeris ge ǀgam !garo!āra ge ǁama hîa ǀhûǁarebese nî ǂgari-aihe !hū!âdi !nâ ǀKhomani ǀhûhâsib !aroma nî ǀgoraǂgāhese ira. Nēsab ge ǁnā ministeris di ministeri, Calle Schlettweina ge ǂanǂan.
Nē ǀgam !garo!āra ge ǀKhomas ǀkharib !nâ ǁgoe, ǁî ǀkharib hîa ǀKhomanin di aixan !nae!hūb ase a ǂansaba. Schlettweinni ge nē ǂanǂansa ǂoa ge wekheb di Wunstaxtsēs ai Parlements !nâ ge ǂanǂan.
Ministeri ge ge mî, ǂhanub ge Korasie plaats !Garo!ās, !Gôas 440 hîa 140 kilometerga ǀAeǁgams ǀawas-aiǂoas !nâ ǁgoesa N$33.9 miljuns ǀkha ǀkhomani ǁaes ǀhûhâsib !aroma a ǁama !khaisa.
ǁNāpab ge !aromade nē mîǁguib ǂnamipe gere mā soab aib ge Schlettweinna ge mî, ǀKhomani ǀhûhâsib, ǂansa !oa ǁkhāti a ǂguro ǁanǂgāsaben ǀKhomas ǀkharib din, 1880ǁî kuriba xun xan ǀnîna !garo!ādi ǀhonkhoe kai ge hā a khoena ra !garo!ā sîsenaose sîsenba tsîn naun hîa hâ!khaiona, ǀnî khoen a ǀhonkhoe-ai omdi ǂnaogu ai ra ǁgoe hîa.
“Sida ǂhanu mîǁguiba ūs ge ǀKhomanin !hao!nāsi ǀhûhâsib di ǂgans ai oe-amsa.
Nē ǁaes ǀhûhâsib khoen ge !kharaga !âgu !hūb digu !nâ ra ǂnarema, ǁîn ǀhûǁarebe ǁan!khai-e ūhâ tama hâ amaga.
ǁNā-amaga da ge kaise ge gaxu ǁaeba !khōǂgā hâ i !hoaǁaredi khao!gâ nē mîǁguib tawa ge ǀkhī, ǁîn di !hū!âsa ǀKhomanina mās disa” tib ge ministera ge mî.
“Nēpa ta ra !gā!gā ǂgao !khais ge, !hao!nāsi ǂgaeguis noxopa dana !âsa !hū!âde ǀgoraǂgās !nâ nî ǀhuru tsî ǂan!gâs xoa!gaos ǂkhanidi tsîna nî māǂuisa.
Nau ǀkhāb ais ǀHûǁarebese ra ǂGari-aihe !Hū!âdi ǀAwemā!nans tsîna ǁîs !ereamsa tani aihâ !âsa nî ǀhuruse.
ǂHanub ge 2023-2033 !hū!nāsi !hū!âde mās di ǁkhawa kō!gâs xoaǁguib !nâ koro miljun hektarga !khōǂgā hâ !garo!āde 2030ǁî kurib kōse nî ǁama ti ǀaweǁgui hâ.
Nēsis kōse di ge 513 !garo!āde ǁamahe hâ, ǀhaob ai 3.1 miljun hektarga !khōǂgā hâde, 5 300 khoen ge nēpa xu a !gâi!gâse. 2023/24 marikurib !aroma di ge hû !garo!āde khoena hâ!khaimās ǀhûǁarebese ǂgari-ais !aroma a ǁamasa.