Ministeris, !Hū-omkhâis, ǁGam-i tsî !Hū!âdi ǀgoraǂgāsa ǁkhawa kō!gâs di ministeri, Calle Schlettweinni ge ge mî, ǂhanub noxopa ǁawose māsa ǂgari-aon tsî !garo!ā ǀhûhâsiga mâxōǀkhās !nâ.
ǂOa ge wekheb di Fraitaxtsēs ai ge ǁîb ǀons !nâ gere khomaihe gowaǀîs, Kadila Aniǂgarib !Garo!ās di ǂhanusi ǁkhowa-ams hîa Kaiǁkhaes !nâ ge hâ is !nâb ge Schlettweinna ǂgaisa ǁGanǂharugub ǀAwemā!nans (Meat Board), Ministeris ǀAsa ǂharuguga !nae kais tsî ǂharugub dis tsî noxopa hâ ǂharugu-aon tsîn ai, in ǁawoǁawo, ǀgaisase mā ǁamaxū!khaigu nî hâsa !hū!nāsise xūna kuru, ǂgari tsî !hanas !aroma.
“Kaise a ǂhâǂhâsa !khais ge sada nî Namibiab ǂhunuma ǂûn tsî xūna ǂgurose mâi tsî ǁkhāti ǁnā ǂgari-aon tsî ǂharugu-aona ǂhâbasa ǂkhâ!nâsa nî mā tsî !hū-omkhâis !nâ ra dīhe ǁgūtsâde nî ǀomkhâi kaisa. ǁKhātin ge !hūb !nâ ra ǂnuwihe sîsenn sîsenmās !aromana, ǂauna omaride ǁawosa hōǂgāsa nî īǁkhā kaiba tsî hoa!nâ-aixase sada !hūb di sâuǁkhāsib omkhâ nî hui,” tib ge ge mî.
Schlettweinni ai!â ge mîs ge, Kadila Aniǂgarib nî Namibiab !aroma aniǂgarib di !gôagu tsî hōǂgāsa ūkhâi tsî nēs ǀkha !auga !hūga xu !nāsase hâ ǁamaǂgāde ǀoroǀoro tsî !nāsa marisa !hū ūhâsa.
Nē asa aniǂgarib di ǂharugub ge !hūb !nâ ǂûn a ūhâs ǁawosasiba ra ǀgaiǀgai.
“Sada ge ǀasa ǂharugub ǀguiba ǂhanusise ǁkhowa-am tama hâ, xawe da ge ǁnāti i turaxasib ǂharugutsoatsoa-aosis, ǀasa ǂâiǀgau tsî aitsama mâbasenhâ ǂharuguba tsoatsoas tsî sada !hūba ais ǁga !gû-ūs dib tsîn !aroma ra !gâiaǂgaoǀhao,” tib ge ge mî.
Nē projeks ge kaise a ǂhâbasa sîsenmās !ēde mās di !âse ǀgui hâ tama hâ, xawe Namibiab ǂûn di ǀharusa aniǂgarib !nâ-ū aro!nâs tsîna !khōǂgā hâ.
Schlettweinni ge ge mî, kurigu di !oedeb ǀnai !hū-omkhâis di !âba Namibiab sâuǁkhāsiba ǁâǂkhōse ība tsî nēs !nâ-ū sîsenmās tsî !âubasensa Namibiab omaride ūbâ hâse.
“A da ǂâis !nâ ūhâ re, Kadilas a aiǁgausa tarena da a sī!nâ ǁkhā !khaisa, aitsama mâbasen ǂnûiǂgās tsî hûhâsigu tsîn di sîsenǁareb kara ǀgui !aromasa sī!nâs !aroma hâ.
Nēs ge ra ǂâiǂâi!nâ da, !khōǁôagus, ǁguiǂgāsens tsî mâǁawos sada ǁkhāsiga ǀhûǁarebese sī!nâs ǁawosasiba ra māsa,” tib ge ge ǀaro.
Kadila Aniǂgarib !Garo!ās ge 100% Namibiaǁîn xa ǀhonkhoe-aihe tsî 400 tongu di aniǁgan-e ǁkhâkorobe māǂui ǁkhā. ǁNāpan ge ǀoasaseb ga nē ǂharuguba a mā soab !nâ 350 khoena sîsenga hō ǁkhā. – Nampa