ONGWEDIVAS – Oshanab ǀkharisi ǁGau!nâs Direkters, Hileni Amukanas ge ge mî, Japanni di !hūǂnûkhaebas Namibiab !nâs ra ǀhurusa. Amukanas ge nē gowaǂuisensa, Japanni di !hūǂnûkhaeba-aob Namibiab !nâb, Hisao Nishimakib di saris, Eluwa ǁUib Skoli (ERS) ǁgab ge ǂoage wekheb Wunstaxs ai ūhâ is tawa ge dī. Eluwa Skoli ge ǁîb tsîn ge ǂgui skolgu Namibiab digu ǁaegu Japanni ǂhanub di huiba xu a domdoreba. Nē skoli ge kurib tsoatsoas !nâ ǀasa !nā-omdi !âba ge !khō!oa hîa 4 ǁkhāǁkhā!nā-omdi tsî ǀgui sâu!nâ!nā-oms tsîna !khōǂgā hâba, ǁkhāsib âb N$925 000 ai ra ǀnōhese. Eluwa Skoli hîa 1974 !nâ ge ǂnuwiheb ge a hoarahus ǀgam skolkha di ǀgui hîa Namibiab a ǂhabase hâkha, ǁnâus !nubusiba ūhâ ǀgôan !aroma. Eluwab ge 194 skolǀgôan hîa !gaoǁgui ǁgau!nâsa xu xrat 9 kōse hân, 30 ǁgau!nâ-aon tsî 42 hoa!nâ-aixa sîsenaon hîa hostels mûǂamaon, !anu-aon tsî administrasi sîsenaon tsî !ûi-aob tsîna !khōǂgā hâna xu hâ. Nishimakib hîa nē kurib ǂguro !âb !nâ !hūǂnûǁkhaeba-aosa Namibiab !nâ ge hāb ge !nona tsēde ge !khōǂgā hâ i saris ǀkha Oshanab tsî Ohangwena ǀkharikha ge sari hâ i, ǁnā skolgu hîa ge Japanni marisihuib ǀkha skolga a hui!nâbahegu mâsiga !haras ase. Japanni di huib ge Marisihuib ǂKhâ!nâs !Gao!gao !âgu Khoesi ǁAwosasib Projekdi (GAGHSP) tsî Namibiab tsî Japanni ǁaegu hâ !Auga!hūsi !Gaeǁares ǂNûiǂgās (JICA)!hū-omkhâis projekdi dis nē ǀgam ǀkharikha dis !nâ-ū ge hâ. ǁÎb ge !hūǂnûkhaes sîsenaon tsî JICAs ǂnûǁkhaeba-aob, Takehiro Susakib hân xa nē saris !nâ ge ǁnūsa i. Japanni di hui!nâs skolga hāǀaro ra omga ǂnuwibas dis ge tani!kharuhe ǁkhā omkhâisens di hakaǁî ǁgūbasa sī!nâs ai a !gao!gaosa tsî ǁnās xōǀkhā mario!nâ ǂam ǁgau!nâs tsî mario!nâ sekondere ǁgau!nâs di ǀamǂoadi, ǀguitikō sī!nâs ǁgau!nâsa hoa !gaoǁgui ǁgau!nâs ǀgôana mās, tsî noxopa ǀnî hâna,” tis ge direktersa ǁîs ǀons !nâ ge !nakaǂnôa direktetrs Hilma Nuunyango-George xa gere khomaihe haisi-ams !nâ ge mî. ǁKhā ǁaxasib tawab gere !hoa soab aib ge Oshana ǀkharisi mûǂamaob, Elia Irimariba ge mî, Nishimakib di nēpa hâs ǂhanub di ǁguiǂgāsens Namibiab ǀgôana ǁîn ǁgau!nâs !nâ-ū hui!nâsa ra ǁgauǂui. Eluwa skoli di ǂnûkhaeba ra danas Ndinelao Nangolos ge ge mî, skoli ge ǂauna !gôab di ǀasa ǂganamsende a !khō!oa xawen !hausens ǀkha hoana nēpa soana go mā ǁoa isa. “Sida ge noxopa hāǀaro ra ǁkhāǁkhā!nā-aomde ǂhâba ǂauna !gôab ǀgôana ūǂgās ase ti mî, “ tsîs ge !âǀhuru-aona gere ǂgan ǁîn !âba ǂgâxa-ūs !aroma.