Abraham Mwanyekange 

OLUKONDA – Oshanamutango ǂAm Skoli, Onakiidhi-B !garo!ās, Olukonda ǁhûi!nâǂharis hîa Oshikoto ǀkharib !nâ mâb, ge 2018ǁî kuriba xu sîsenūhe tamase mâ, ǁkhāǁkhāsenaon di !gôab a ǂam !khais xa ra !aromahese. ǀHûhâsib di ǁgûn tsî ǂgaeǂgui-aon ge nē mâsib xa a ǂkhîo!nâ. ǁKhāǁkhāsenaon di xoaǂgāsens !gôab ge ǂgaoǀkhāsa ǀorodomma 50 ǀgôan dib xa a ǀoro soab ais ge Ministeris ǁGau!nâs, ǀAsa ǂâiǂuisa ǀgaugu, ǂKhamkhoesib, ǂGamǂgamsenǀhurun, ǂNuwiǁkhāsib tsî !Hao!nāsi ǁNaetin dis di Oshikoto direktoratsa skola ge ǂganam. 

Aitsamamâbasens Tsēdis di ǁâudīb hîa ge ǁnā skoli di !hūs ai gere dīhes tawab gere !hoa soab aib ge, ai!âkam ǂgiǂgosi ǀawemā-aob, Olukonda ǁhûi!nâǂharis dib, Phillemon Ndjabulaba ge ǂgan îs ǁgariǁgarisa ôa!nâsa dīhe, !aromadi nē skoli di daodi ge ǂganambahes ǂnamipe. Ndjabulab ge mîs ge, ǁîb nē berosa xu nî ǂoas ai!ân ge ǀhûhâsib khoena a ǂgan !khaisa, in ga ǁkhā skola sîsenū tsî !omkurus ǁkhāǁkhākhâidi sentersa a tsoatsoasa tsîb ge ǁnā ǁaeb ai ǂhâbasa ǂganamsens ǂkhanina ministeris ǁga a sî!kharu !khaisa. “ǀGuitimî tsî ta ge ǁnā berosa xu a ǂoas khao!gâ ta ge ǀguis khami ī !eream-e Oshikotob ǀkharisi ǁgau!nâs direktoratsa xu nē ǂganamsens ǂnamipe !khō!oa tama hâ,” tib ge ge mî. Ai!âb ge mîs ge, ǁîba xu ge !khō!khuni ǂgaeǂguis tsînab ge hoaraga ǂhâbasa ǂkhanina a ǁkhaeǁnâ !khaisa nē ǁhōb ǂnamipe. Nēsi hâ ǀawemā-aob, Mathias Zambia Shafoolib ge a mîs ge, ǁîb beros ǁnā ǁaeba xu !hoaǂharugudi !nâ hâsa Oshikotob ǀKharisi Mûǂamaob Beros ǀkha, mā-amhe tsîn ga nē skoli omga ǀhûhâsib omkhâisens !aroma a sîsenū !khaisa. “Hana da mā-amsa nî !khō!oas kara, o da ge ǁnāpa ǀawa!namn berosa nî ǁkhowa-am, nē ǁhûi!nâǂharis !nâ da ǀawa!namn bero-e ūhâ tama amaga,” tib ge Shafooliba ge mî. Oshikotob ǀkharisi direkters, Hilma Nuunyango-George ge gere ǁgui!ā, ministeris di ǂgaoǀkhādi !oa i ǁkhāǁkhāsenaon di !gôab ga ǀorodomma a 50 o ǀgui skol-e a ǁkhowa-amhe ǁkhā !khaisa. “Sida ge skol-e ǁnāti ǀgui ǂganam tama hâ. Aibe di ge !hoaǁaredi tsî ǁnâugude tsâǀkhāsa ǀhûhâsigu ǀkha ra ūhâhe, tsî ǀgui ǁnā mîǁguib kōse ra sīhe,” tis ge ge mî. ǂGanams khao!gân ge ǁgau!nâ-aon tsî ǁkhāǁkhāsenaon tsîna ǀkhara skolgu ǁga ra ǂnûihe, ǁgaris !nakas ose, xawe aitsama mâb ǁga-i ra īs di mā-amsens !naka.