ǁAe-e !kharu tsî ta ge ǁkhoaxa ǁgamǁare-e ti kai khâihâ ǁkhara ǀhōsa-i ǀkha ge ūhâ i. Sim ge mâsib hîa nēǁaeb di ǂkhamkhoen !nâ hâb, !gōsase taredi ǁaegub îsase mûsens dib xa gere !hoa. ǁÎb ge nēs ai kaise ge !gâhesa anuba te i xū-e ge mî, “ǂKhamts karao, o a ǁnaetisa !khais ge khoen hîa anusa tsî !amkuse ra mûsenn ǀkhats ra mûǀhaohe ǂgaosa, xawets kurin !nâ ra ǂgâ khamin ge khoena sats ǀkha ra hâma ǂgao, sa ǂkhûs di îxasib!aroma”. ǂKhûs di îxasib ǀkhab ge ǁîba gere ǂâibasens ge, !gâhesa anu, omkhâi ra tsî xū-ets a ǁkhā-khāsenxū ǁkhā ǁgamǁaredi !nâ ǁhaosa tsî ǁî-i di ǂnamipe hâ khoena ǂans !uruse ība.
Sada ge ǂgui kaikhâihâ khoen sada ǂnamipe ra hâman di aiǁgaude ū ǁkhā; ǁnāpan ge ǀnîna hâ mâ-i ǀgui-i ga ǀawemā xawets ǁî-i tawa ra sī tsî ǂōrisae !gâ tare-en ra mîsa, xawen ge naun tsîna hâ -ǁîn tawa sīsats aibe ǀgam !nāra nî ǂâi!gâsa ǁî-i nî mîba tsî ǀawemās ǀgūs tsîna omkhâigus tawa hî tama xui-ao. ǀGui xū-i hîa da hoatsama a ǀhûgui-ū ǁkhā-i ge mâtits ra mûsens ǁaerob ǀguiba ra hâsa. Kurigu ra ī tsî kurina ǀarosen khamis ge sa soros tsîna ra ǀkhara tsîs ge nē kuris goro mûsen khami !goaxa kuri mûsen tama ra ī. Mâ ǁaeb hoab sats !aruǀî îxase mûsen tama ra īb hoab ai-i ge ǀnî îxa khoe-e ra ǀomǂoaxa tsî sats xa !nāsa îxasiba ǁgauǂui.
ǂKhûs di îxasib tamas ka io sa ǁnâu!āb ge nau ǀkhāb ai kurigu ra ī khami ob ra ǀā o ra ǀā tsî ra hâhâ. Aiǁgausa ta ge a mā ǁkhā kurikorobe ra ǂoaxa inkinibedi xa, ǀasas ra ǂoaxas kōsedi ge naudi hîa ge ai!â ǂoaxa hâ ide ra kā îxasib hoab ǀkha, ǀurus tsîna da ra dīse mâs ge ai!â ge hâ i kurib !nâ ǂurose mâ isase.
Khoen ge hâ sorosi îxasiba mâǂoa tsî xawe ǁkhāti ǂkhûs îxasib tsîna ūhâna. Michelle McLeans ge a ǀgui ǁnān disa.
Sats nî tsēkorobe sa ǂkhûsa ra ǀomkhâi kai tsî ǂansa khoraǂui xūn ǀkha nî -ǁaeǁaesens kara, ots ge kai xū-e aitsama ra dībasen khoe-i satsa xu tātsē ūbē ǁkhā tide-e. Sada ge ǂans ra ǁgūbahe ǁaeb !nâ ûihâ, tsîts nî mû !khais ge ǂansa ūhân tamas ka io ǁkhowa-amsa ǁnâu!âba ūhân ra on ra ǂharo o ǀgapise ǂharo tsî ǂans ǀhonkhoese nauna ǁîn ra ǀkhōse ra ǂnā kaisa, îxase ra mûsenn tsîn hoana !khōǂgā hâse.
ǀUnis ai da a ǂans ge !gâisets ga mûsenise ra tsâsa tsî !gâise tsîs ge sâsasib tsî ǂkhîsasiba ra mā tsi. Tare-i ǀgui-ets ga dī xawe sa ǂkhûsa !â kai re, ǂkhûs di ǀgaib ge a ǀgai xuige.