ǀAEǁGAMS – ǂOa ge kurib di Taraǁkhumuǁkhâba xus ge Ministeris ǂNamipeb tsî !Aub!ûi!gâs disa ge ǁnāǂgō. khoen tsî !aubǀgurun ǁaegu ra hâ !omguden ǂgari-aon tsî ǀhûhâsigu tsîna mâti nî !khōdanas !nâ ǁāǁā nîs !aroma. Nēsas ge ministerisa ǀnai 40 xa a !nāsa !aub!ûi!gâdi !nâ ǁkhāǁkhākhâide dī hâ.
Nē ǁkhāǁkhākhâidi di ǁgūbas ge ǀhûhâsigu khoena ǂhâbasa ǂans tsî ǁkhāsiga māsa in hâ ga ǂkhôadīgu khao!gâ mātare-oahes ǂganamsende dī ǁkhā tsî khoen tsî !aubǀgurun ǁaegu ra hâ !omgudi tsîn mâsiga hâ a !hū!nāsi xoaǁguigu !naka oresa hōba.
ǂOa ge kurib Taraǁkhumuǁkhâb tsî Hôasoreb hâkha ǁaegus ge ministeris di departements !aubǀgurun !ûi!gâs !âb disa 45 !aub!ûi!gâs !nande sao ra ǀkharigu !nâ ǁkhāǁkhākhâide ge mā, ǂgaiǀons ai Erongob, Kuneneb, tsî Omaheke !nâ. Kuneneb hîa !khawagas tsî ǀawas âb !nâ 38 !Au!ûi!gâde ūhâb, haka !aub!ûi!gâdi Erongo ǀkharib !nâ tsî !nonade Omaheke ǀkharib !nâ a dītoa, xawes ge ministerisa noxopa 40 !aub!ûi!gâde nî ǁkhāǁkhākhâise !gaubahe hâ.
Dana !Aub!ûi!gâs mâisab ministeris !nâb, Absalom Vilhob ge Nampasa dî!nâǁgamǁare-i !nâ ge mîba, haka !aub!ûi!gâdi Erongob died xu ra ǀgamra gaxuse sîsen tamase ge hâ i, tsî Omahekeb !nâs ǀgui !aub!ûi!gâs !nansa xū-e dī tamase ge hâ i !khaisa, xawedi hoade a ǂhomisa ǀasase sîsenxasigu ǀkha tsoatsoas !aromasa.
Ai!âb ge Vilhoba ge mî, !nāsa !aub!ûi!gâs !nandi Kunene ǀKharib !nâ ge ǁkhāǁkhākhâide a !khō!oadi tsîn gaxu ǁaeba ǁūse go hâ isa tamas ka i o ǂâuǀoassib !nâ khoen tsî !aubǀgurun ǁaegu ra hâ !omgude oresa go hōba ǁoa i !khaisa, hâ a marisan ǂhanuse sîsenū tama goro is ǀkha. “Nē !aub!ûi!gâs !nandi ge marisihuiba ministerisa xu ra !khō!oa, !omgude ǂhanuse sîsenǂams !aroma, xawen ge -îna nēsa ǂgaoǀkhāsa gaugu !nâ a dī ǁoa, !nubusib ǂans tsî marisa ǂhanuse sîsenūs ǀkhan ǂnôa xui-ao.
ǁNā-amagas ge nē ǁkhāǁkhākhâisa !aub!ûi-aon ǀguru!hanagu din ai ǀgui hâ tama go hâ i, xawe !omgudi !nuri!gâdi ǂnamipe hâ sîsenxasigu ǀkha a !nao-aisa komitedi ǁanin tsîna go !khōǂgā hâ i,” tib ge Vilhoba ge mî. –Nampa