ǀGamǁî !nās ase nî Tsaraxa-aibes !nâ ǂnāǁnâse a ǀaweǁguisa ǂHarugub ǁGauǂuidi ge 12 xu 14 Taraǁkhumuǁkhâb 2024 nî hâ tsî ǂoa ge kurib xa !nāsa !gôab khoena nî ǂgae. 

Nē ǁâudīb hîa Tsaraxa-aibes ǂHarugub ǁGauǂuidi komites xa Tsaraxa-aibes !Ā!khōmais ǀkha hâ ǀhûǁ-areb ǀkha !khōdanahe hâs ge, ǀgaisa !âsa ǂkhari tsî ǁaegub ǀnōb ǂharuguna (SMEs) ǁnā ǀkharib !nâ hâna ǂkhâ!nâ tsî ǂhabase ǂanhes !nâ ra ǀhuru.

Aiǂnû-aob, Tsaraxa-aibes ǂHarugub ǁGauǂuidi komites dib, Unomasa Kavitab ge ge mî, nē ǁgauǂuis ǁnāti ī !ēsa ǂkhari tsî ǁaegub ǀnōb ǂharugu-aona ra māsa, ǁîn ra ǁamaxū xūna mâi-ai!â, ǂanǂan tsî nēs ǀkha ra !gûǁ-arese, nau hâ ǂharugu-aon ǀkha ǂangu tsî hâ ǁkhā ǀasa !ēdi !aroma !hûǁaresa. 

“Nē !noa tsēde nî !khōǂgā ǁgauǂuis di ǁgūbas ge, ǂkhari tsî ǁaegub ǀnōb ǂharugu-aona ǂgaoǂgao!nâsa, ǁîn ǂharuguga ǁamaǁama tsî ūn hâ ǂharugub ǂnamipe ǁkhāsigu tsîna ǁgauǂuisa. 

Noxopas nē ǁgauǂuisa ra sī!nâ ǂgaos ge, ǂâuǀoa hâ hâǁareb ǁaeba ǀaokhoen tamas ka i o omaride māsa, ǂaunasen ǀgôarona nî ǀhuruǂâu !khaib tsî !gâi!gâisens !khaiba kaikhoen !aromas tsîna,” tib ge Kavitaba ge mî. 

ǂOa ge kurib di ǁgauǂuis ǀkha i kara ǀgoweǀnōhe, os ge nē kurib di ǁgauǂuisa ǂauna !gôab di ǁgauǂui-aon xa !gâi!gâibasensa ǁgau!nâhe hâ, 40%gu ǀkha ǂharo hâ !gôab di ǁgauǂui-aon tsî ǁhao-aon ra !âubasenhese. “ǂOa ge kurib di ge ī ǂguro ǁgauǂuis ge 1 400 xa a !nāsa khoena ge ǂgae hâ i, 40%gu ǂharos nē ra !âubasenhese. 

ǂKhari tsî ǁaegub ǀnōb ǂharugu-aon di !gâi!gâibasens nē ǁgauǂuis !nâb ge nē kurib !nās !aroma ǀgam !nāra !gôab kha ǀarosen hâ, ǂoa ge kurib ǀkha i kara ǀgoweǀnōheo,” tib ge ge mî. 

Nē kurib ǁgauǂuisa nî sari khoen ge !kharaga!nâgu  ǁaxasina n !âubasen, aiǁgause, merry-go-rounds, ǀgôaron nî ǀhuru !khaib, ǂnāb hîa nî ǀhuruheb, kaikhoen nî !gâi!gâisen !khaib, tsî noxopa ǀnîna. 

ǂGarib, nē ǀkharib ǀomkhâis !aromab ǁîba a dana sâuǁkhāsib ǁuib tsîn ge nē -gauǂuis !nâ nî !khōgāhe tsî !kharaga !hū-omkhâis xūna nî ǁgauǂuihe. 

ǂGarib ǁgauǂuidi !ân ge !âubasensa !oa ǂkhariǀnû ǀgoan ǁgan-i, ǀhō-i tsî !kharaga !hanaǂûna nî ǁamaxūhe. ǁKhātin ge khōna xu a kurusa xūn tsî !hao!nāsi saran tsîna nî ǁ-amaxūhe,” tib ge aiǂnû-aoba ge mî. 

!Nāsa ǂansa ga ǁamaxū!khaiga hōbasens !aroma a ǂhâba ǂharugu-aon ge Linus Sinvulaba 063 245600 tamas ka i o 0814277001 tawa nî ǁkhami. 

Emails tsînats ge lsinvula@marmum.org.na ǁga a xoa ǁkhā.

 *Helena Kandumes ge MICTs di ǂansa mā!kharus mâisas Hardap ǀkharib !nâsa.