ONGWEDIVAS – “!Khare iri ׀guiba ║ama╪ui tsî sa ôana khomaibas ge ╪gui !gâi!gâna ║îna !khō╪gāba ║khā. ׀Gôaro!hanab ║gau!nâ-aon tawa i ge nî tsoatsoa ║gûna ׀awemāsa in ׀gui !nāsa tsēs !nâ ׀gôarona khomaiba mâtikōsen ga tsauhâ tsēs di sîsengu khao!gâ xawe. Khomais ║khāsiba omkhâis ge a !gâi ║naeti ╪kham kurin !nâ-i ga a !noma!khō kaihe o. ║Aeb mâ hîa tsoatsoas ge !gâin ׀guina !khō╪gā hâ !âu tsî ׀gôan kai!nā hâ hîa ║gari║nâs xa. ║Gûnan Namibiab !nâ hâ ╪khani║amaxū!khaigu tawa ׀gôaro╪khanin hîa supu gowab !nâ xoasa tsî ║nâu!ās tsîna a supun xa ׀gôarona ǁamaba hoaǁae ׀huru-ūxūn ׀guina ǁamas ose. Nēti ī khomaibahes ║aeb !nân ge ׀gôarona ║gûna ║nâun goro khomai!âs !nâ xūn xa dî!nâs !nâ-ū ╪gui xūna ra ║khā║khāsen. Ai║gause-i ge ║gû-i tsîna khomaitoas khao!gâ ׀gôa-i !harib ai hâ dîrona a dî!nâ ║khā ׀gôa-i !khōmâis tsî ║nâu!āba ׀gai׀gais ase.
Khomais ge ׀gôan a ╪khariro hîas nî tsoatsoa-ūhes kara o, ׀gôan ║nâu!āga !augab ûib !aroma ╪hanuse ra ║khowa-am. “׀Gôarona ╪kharirosisa xu khomaibas ge khomais di ║khāsib hîan ║îna skolan kara ╪gâtsoatsoa o ╪hâba hâb tamas ka io kaisis !nâs tsîna nî ╪hâbaba a !omma!khō kai ║khā. ׀Gôaro╪khanin ge !nāsa ║aega mûnanaib ׀gôaron diba ra omkhâi tsî nēs ge ║în ║nâu!āga ûib hîan noxopa mû tamab !aroma ra ║khowa-am tsî ║nâu!āb tsî ╪âi׀gauga ra khora╪ui.
Khomais ge ║nāti ī ׀gôaron !hae ║nâu!āga ūhâ tsî khomais !nâ !gâi!gâibasensa ūhân !aroma ║khoaba ra mā. Khomais ׀guis ge a ama !gâi!gâisenxū hîa ûib ║khāsis tsîna ība. Hoada nî khomai !khais ge a ╪hâbasa mâ║ae-i ׀gui-i ais kas tsî mâpa ׀guis ka xawe. ׀Gôan on nî khomais ge a ╪hâbasa in skolgu !nâ !âide !kharu tsî khomais !nâ-ū ║khoaba ║gâudi tawas tsîna ׀ama ║khā. Khomaits ras kōsets ge sa !hoa׀gaub tsî xoas ║khāsiba ra omkhâi. ║Khātits ge ╪âibasens ׀asa mîn disa ║khā║khāsen tsî nau !hūgu !nâ ra ī xūn ╪ans tsîna ra tani. Sats ge nau khoena xu ra ║khā║khāsen ║în xoa hâ xūnats ra khomai amaga tsî nēs !nâ-ū ra huihe ׀asa ╪âi׀gauga hō tsî nau khoen ╪âi׀gauga !gôa!gâsa. Khoets ╪âi׀gaub ║khāsiba ra omkhâi tsî !nape!nape!nâ mû╪gāgu ra !kharagagu tsîts khomais !nâ-ū sa daode ra ║khowa-ambasensa.
Khomais ge ║khāti sa ╪khûsa ╪khaikari ra ūhâ. Khomais !nâ-ūts ge ׀asa ╪ansa ra ׀arobasen tsî ga-ai. ╪Khanina khomais ge !gomsin hîats sa skolsîsenni !nâ ūhân !ereamde ra mā tsi tsî sa ║khā║khā!khō╪gāba ra hui!nâ. ╪Khanin ge ║khā║khā!nâ!nā-oms ׀guis ╪ans ose ûib ║khāsigu tsîn !nâ !gamse ra ╪gâ-ū tsi. “╪Khanin ge khoets mûgāga hoa !hūbaisise ra khora╪i tsî ׀nai noxopats sī!nâ tama !hū-i !nâ ra īn tsîna ׀orose ra ╪an kai tsi.