Xoa-aob: Engel !Nawatiseb
TSUMEB – ╪Gi╪gosi ׀Awemā-aob, Tsumeb ǁhûi!nâ╪haris dib, Lebbeus Tobiasi ge Namibiab ╪khamkhoesiba gere ׀khoma in hoa kai tsî kaira ǁan╪gāsaben Namibiab dina !gôasib tsî ׀nammi ׀kha ûi-ū.
“Tita ge kaise ra ╪âi╪hansen tarekhoedi tsî ׀gôan !oa-ai hâ ╪khawadīb ob ra ai!gû tsî ╪harob ╪namipe tsî nēs xō׀khā kairan !oagu hâ ╪khawadīb hîa ׀gam !nāra a ׀gapib xa. Nē mâsib ge ra !nape!nape!nâ da Namibiaǁîda aseb kairan ra ûi!nâ mâsiba hoada ǁgoa╪uis ase nî ība tsî nēs !oagu oresa hōsa nî ǁgūbasa,” tib ge Tobiasa ge mî.
╪Khamkhoesib ge nē !noesa ûi׀gaub, marina ama tama xūn ai ╪khôas dib âna xu ╪au╪ausentsoatsoa tsî !nāsase ǁîn di kairan ai marina mā╪uitsoatsoa ǁkhā ǁîn di ׀huwuba xūn ra !khō!oa marina ǁau tama dommi ai ╪hâbasa tama ׀gaugu ai ╪khôas !ās !nâ, !gōsase ╪auxûib tsî tabakab ai. “Hoada ge kaira ╪gao tama is !aroma ra !kham tsî ǁnā-amaga ǁaeb tarena !khō╪gāba da hâsa !nape!nape!nâhe ╪gao tama hâ. Nē mâsib ge kairana ׀hûhâsib tsî ׀aokhoen âna xun a ǁara╪uisa tsâsib !naka ra mâi. Kairan ge ǁîn khoen ╪hunuman xa ׀nîsin xū-e !oa╪ui tsî !gâiba tamas tsâsib !nâ mâihe, ╪hanib ase ׀gui ׀aokhoen ân xa mûhe tsî !nāsa ǁaega ׀uruhe hâse ra hâ. Hoaran ׀nîna ׀nîsi ra ╪âihohe ǁaeb ge !Khūb!naes tsî !naetsēs aisa,” tib ge ge mî.
׀Awemā-aob ge Tsumeb di ╪khamkhoesiba gere !nape!nape!nâ in tā ׀uru mâpa xun !goaxa !khaisa tsî hoaǁae ╪âi-oa !huis ana tsî kairasi-i a îxa xū tsî !gôasib tsî khoesis âtsa ╪an!gâhesa ra ╪gao׀khāsa.
ǁKhātib ge Tobiasa Tsumeb di ╪harugu-aon ai ╪gansa gere dī,, Tsumeb Kairan ╪Gaesa ׀gai׀gai!nâs !aroma marisi ╪khâ!nâsa māsa. Nē ╪gaes ge ׀Awemā-aob beros !naka ra ǁnā tsî ǁîb mû╪ams !naka hâ.
“Kairan ge ׀nai ǁîn di sîsenna ge dītoa nē îxa !ās hîa Tsumeb ti a ╪ansasa ǁîn di aosenni tsî ǁgui╪gāsens ׀kha ╪nuwis ׀kha tsîs nētsē nē ╪an!gâsa !haros !nâ ge sīs kōse. ǁÎn ge !gâi sîsenna ge dī tsî ╪gom!gâsensa ūhâ ǁîn ûigu ge !gâi sîsen╪uiba ūhâ isa, ׀gôana kaikais, Tsumeba !gâi ǁan!khaise dīs tsî !goaxa ǁaeb suriba ǁkhāǁkhā tsî ǁāǁās !nâ. ǁÎn ge !khūsib ╪ans tsî ׀umis dib ׀kha ╪nôa ׀goragu nîse, ╪an-tsî-hō!âs ׀kha !hûǁarede dīs !aroma, tsâsendi tsî ׀awemādi ûib ╪namipe hâde naun ׀kha ׀goragus !aroma tsî hoaraga ׀khara ûiba ǁōb khao!gâ.
ǁÎn ge ׀gui ╪noa!oa-i tsîn ose sada ׀nammi tsî !gôasiba ge !oa╪ui,” tib ge ׀awemā-aoba ge mî.
Tobiasi ge hoa!nâ-aixa xoa-aon tsî !nae!khaide ra xoa khoena gere ╪gao╪gao!nâ, in kairan ra ǁgam !nae!khaidi tsî ╪hôade xoamâi !goaxa surib !aroma. “Ama tama i ga ī, kairasib ra ╪gâ khami da ga kairana !nāsase a !gôa!gâ !khaisa. ╪Khamkhoesib ge a ׀ū mâtikō ǁuib tsî !khūsiban ra ╪oa!nâsa ǁîn kairan ׀khan ǁaeǁaesen tama i tsî ׀gūmādi tsî ûib di ǁkhāǁkhāde ra ╪oa!nâsa. ǁAeb ge a ׀honkhoe tsîn ge ׀haidanana ׀gui׀guibese ǁîn di ╪ans ׀kha !hū╪namsa ra ana tsîs ge ǁaes tsî !hūb !aroma ╪oa!nâsa kaise ra kai. Kairasis ׀khas ge ╪ansa ra !khū tsî ׀oa tsî da ge !nāsa xūna ǁîna xu a ǁkhāǁkhāsen ǁkhā hana da ga ǁaeb mâ hîa ǁîn ׀kha nî ǁaes karao,” tib ge ge mî.
“Kairan ge ge sîsentoa tsî ׀nammi tsî khoexa!nâsiba sada xu ra !âubasen, xuige tā nētsē ǁnās xa kaibahe tsî ǁîn tsîna ׀nommi tsî sâsâsiba tsâ kai,” tib ge ׀awemā-aoba ge ׀am׀am.