Xoa-aos: Jemima Beukes
╪NŪ╪GOAES – Ministris ║Gau!nâs dis ge ra │awe║gui ôa!nâde dīsa ║nāti ī skolgu hîa ║aegub │nōb !naka hâ !nuriga !nona kuriga saogubese ra ╪oaxa-ūgu ╪namipe. ║Gau!nâs Ministeri, Dr David Namwandib ge ╪oago wekheb aib ge New Erab │kha ūhâ i !hoa║are-i !nâ ge mî, kaise i a !hau!hausa !khaisa ║Karas │Kharib di Xrat 10s !nurigu !kharu ge !nani kurigu │gaiba 41s tsî 47.5 persentgu ║aegu hâsa.
“│Awe║guiga da ge nî sîsen╪ui nē mâsiba gowa│îs ase, skolgu Namibiaba nî ║nā!gâsa da a mā-am ║oa amaga. Xawe da ge sida tsîna ╪ōrisase nēsa nî sîsen╪am tsî ╪gurose nî ╪an ╪gao ôa!nâdi !nâ-ū, tare-i nē ╪khawusa !nurigu tsî ai!gûsa ra !aromasa. Kō da ge nî ╪namipeb a ╪uru tsî sâsâ !khaisa ║gau!nâ-aona │gôana ║khā║khās !aroma. Nēs !nâ-ū da nî hō╪ui khoe-i ra nē ╪khawusa ai!gûs │gôan disa ╪hanisa o di ge dā!harode ║nā khoe-i !aogu nî ūhe. │Hapio khoena da ge ║khara ╪gao tama hâ, ║nā-amagas ge ôa!nâde da nî dīsa mâpab !gomsiba ║goe !khaisa ╪an╪uis !aroma. Sida ge ║gau║gaude ╪uru╪uru ╪gao tama hâ xawe │aeb ╪hunuba,” tib ge Namwandiba gere !gā!gā.
║Karas │Kharib ge 14 │khariga xu 11║î !haros !nâ 46.4 persentgu │kha Xrat 10s di !hū!nāsi !âis Junior Sekondere Sertifikati (JSC) │uni !nurigu !nâ 2013║î kuri ge │am. !Kharu ge !nani kurigu ║aeb !nâb ge nē │kharib di Xrat 10s !kharus !gôaba 41 persentgu tsî 46.9 persentgu ║aegu ra hâma. ║Khātib ge nē ║aeb !nâ aitsamab ge │kharib ase ║gūban nîse mî║gui 50 persentgu di !kharus !gôab tsîna sī!nâ tama hâ.
Namwandib ge nē soab ai ║nāti ī sîsenūs Afrikaans gowaba ║khā║khā!nâ gowab ase ╪hanub skolgu !nâ sîsenūs !oagu │gaisase gere ║gâi╪uisen. “Tān ge sida │kha nî │huru ╪gao, Hurigowab ge a ║khā║khā!nâ gowa hoa xratdi !nâ, !gao║gui║gau!nâs tsî ╪am ╪am!harodi hîa Afrikaansa ║khā║khā!nâgowab ase ūhâdi │guide ╪oa tsî. ╪An╪ui da nî ministris │khāba xu mâ skolgu tsî ║gau!nâ-aon nēs !nâ ra │hapi│hapisensa tsî ║în │kha ╪hâbasa !harigu ai sîsen,” tib ge ge mî.
║Karas │Kharisi Mû╪amaob, Bernadus Swartbooib ge ║îb di gowa│îs hîab ge ║gau!nâ-aon tsî skoldan │kha ╪oago wekheb !nâ ūhâ is tawa ge mî “ kaise i ge a !hau!hausa tsî tsûtsûsa nē │kharib ra mîb ge hâ i 50 persentgu di !kharus !gôab hoa xratdi !aromab !naka ai!gûsa. Swartbooib ge !aru│î ge mî, ║khā║khās tsî ║khā║khāsens !nāsa ╪amskolgu !nâ hâs ra ║îba kai dîsaoba mâi kaisa. Nēb ge ║îb a kai !gomsib hîa ╪khawusa !nuriga Xrat 10s tsî 12s hâra !nâra !aromaba.
“ Nēs ge tita !huri kais tsîna dī tama hâ nēti ī ╪khawusa !nuriga Xrat 10s tsî Xrat 12s hâra !nâ hōsa, !nāsa skolgu !nâb !gao!gaoba ╪hanuse ║guihe tama xui-ao tsîn │gôana ╪khamsis !harode xu │nai ╪gao│khāsa ║khā║khāsens !gao!gao║khāsiga sī!nâ tamase sekondere skolgu !harodi !nâ ra sîse,” tib ge ge mî.
Swartbooib ge dîsaoba garu-a !hara!âis di !gôagu ra māhe │gaub ais tsîna gere mâi │gôan di !âidi ai!gûs │khāb gere │gowe│nō o. Kaiseb ge kai !kharagasiba │gôa-i di garu a !hara!âis !gôab tsîxoa-i go !âis di !gôab ║aegu ra hâ.
Tabeli: Nē tabeli ge !kharu ge !nani kurigu di !kharus !gôagu ║Karas │Kharib diga Xrat 10s !hū!nāsi !âidi ╪namipe ra mâi-ai!â.
| Kurib | !Kharus !gôab
|
|
| 2008 | 46.9% | |
| 2009 | 41.0% | 5.9%gu │kha ║nās |
| 2010 | 45.0% | 4%gu │kha ║nās |
| 2011 | 47.5% | 2.5 %gu │kha ║nās |
| 2012 | 45.1% | 2.4%gu │kha ║nās |
| 2013 | 46.4% | 1.3 %gu │kha ║nās |