ǀAEǁGAMS – ǁNāpas ge !Hū!nāsi !Norasa Skolgu Daoǁgauba (NSSF) hanusise gere ǂanǂan soab ais ge Ministers ǁgau!nâs, ǂNuwiǁkhāsib tsî !Hao!nāsi ǁNaetin dis, Katrina Hanse-Himarawasa ai!gû rase skolgu !nâ ra hō!âhe ǂkhawadība ǀgaisase ge !haraxū.
“!Nae!khaidi ǂkhawadīb didi ge sada skolgu !nâ !kharaga ǀgaugu ai ra hō!âhe, tsî da ge hoatsama mâǀhao tsî nē mâsib ai!gûsa ra !khom!nâ ǂgaose ra ība nî !khamǂui,” tis ge gere mî. Hakadisis xa a !nāsa !gôab di skolǀgôan Ella du Plessis ǀGapi Skoli, Khomasdal ǁanǁguib ǀAeǁgams dib !nâ ǁgoeb !nâ mâb din ge hâ ge ǂkhawadība ǀaweǁguis tsî ǂkhawadīb !nâ ra sîsenūhe xūna hōs !nae!khai-e xu ǀgūǁae ǁgâudi ga ge sī-oahe hâ i, ǁnāpas ge ǀawa!namn di ǁnāǂams nē skoli dis khao!gâ !kharaga !khamūxūn tsî ǂauxûib tsîna a hōhes khao!gâ.
ǁAupexan ge !nani ǀawa!namna skoli tawan ge sīs khao!gâ hoa ǀgôana ǁkhāǁkhā!nâ!nā-omdi !nâ !khâiǂgā tsî gere ǁnara. ǀGôan tani hâse gere hōhe xūn ge aiǁgause gôan, skuruwedraern tsî !kharaga ǀāxūn, mûsen!nâxūs di ǀā !âron hâna, Ministers ge ge mî, ǁîs ministeris a ǀhawesa ǁGau!nâs ǂHanumās hîa ǁgaragu tsî ǂhanuga !khōǂgā hâs di ǁkhawa khō!gâs ǀkhasa hîa parlements !nâ nî ǁgui-ai!âhesa.
Nēs ai !gâbasen hâses ge minitersa ge mî NSSFs ra ǂhanugu ai !gao!gaosa dīgauba ǂkhâ!nâsa, ǁîb ra awoawo amaga ǀguis khami ī skolǀgôa-i tsîn ǁgau!nâsa ǀhanahe tidesa ǂkhawadīb tsî !norasao!nâ skol ǂnamipegu xa ra !aromahese !khaisa. !Aruǀîs ge ǁîsa ǀgomǀgom!gao tsî ge mî, !norasa skol ǂnamipeb tsēs !nâ īǁkhā tamasa xawes nēsa !haro!harobese ra !gûǁnâsa !norasa ǂnamipeba hōs !aroma. NSSFs ge hû dana !khaide ra aimâi tsî !khōǀgaras ase. ǂGuroseb skola nî dīs ge !gomsisen ra hō!â !âga ǁgauǂui tsî tare-i a !gomsis tsîna tsî nēs khao!gâ tarenan a dī ǁkhās ǀkha tsoatsoa tsî ai!gûsa kōǀgaras tsîna.
ǀGamǁîse nî saon ge skolǂgâs !aroma ǁkhoreǁhare tsî turaba ra mā ǂnamipeb hîa !gāsa ǁgaragu tsî xoaǁguigu, !nuriǀgaugu tsî ǁnaeǁgaudi mâǀî tsî mâti nî hâs hâna. Nē NSSFs di daoǁgaub ge ǀhûǁarebese nē ministeris tsî Hoa !Hūbaisi ǀGôaron ǂGaes (UNICEF) hâra xa ge ǂgaekhâihe.