ǀAEǁGAMS – Namibiab ge !gôaǀhaob ai 18 686 !nubusib ǁgau!nâ-aon, ǀae!khō-aon tsî ǀawa!namn diba ūhâ, mâsib hîa ra !aroma tsî ǂhanixūse !hūb di ǁgau!nâs, !norasasib tsî ǂurusib !oabade ǂgaoǀkhāsa tsî ǂâuǀoa hâ !harib ai !hūǁîna !oabasa ībana. !Gôagu hîa nē !nona !âgu mâisana xu !khō!oahe hâgu ra ǁgausens !oagub ge !nubusiba ǀawa!namn hîa !norasasib tsî ǁawosasib !hūb diba nî ǁawoǁawose in !nâ 7 886 ai mâ, ǀae!khō-aon !nubusib 4 800 ai mâ tsî ǁgau!nâ-aona 6 000 ai mâse.
ǀAwa!namn di Danab, Xeneral Sebastian Ndeitungab, Ministeri ǁGau!nâs dib, Dr David Namwandib tsî ǂHaitsi !Oabadi Mâisas Ministris ǂUrusib tsî ǀHûhâsi !Oabadi Ministris dis, Esther Paulus tsî hân hoan ge nē mâsib !nubusib sîsenaon dib nē !nona !âgu !nâ hâb ǀkha ge ǀhûǀgui. ǂUrusib, !norasasib tsî ǁgau!nâs !âgu ge ǂan da ase ǁîgu !nāsa !âb mariǂnûiǂuis diba Namibiab !nâ ra hōga !hūb !norasa xu, ǁaupexan beljundi marina ra hōse. Skolgu ǁga da ga kō o noxopa a ī !khais ge ǀnî skolgu nēsis kōse 1:50ai mâsa, ǂâibasen rase 1 ǁgau!nâ-ao-i 50 ǀgôan ǀkha ǂnôasa, nau ǀkhāb ai di ǀnî ǀawa!namn berodi tsî ǀae!khō!khaiga kai !nubusib !oabade nî mâ khoen dib ǀkha ǂnôase.
Nausab ǂhanuba ǁkhāb ase ra dītsâ kurigu !oede nē mâsiba hâhâ nî oresa hōbasa, xawen ge mâisan nē tsâǀkhāsa !âgu dina ra mî, !nubusib maris dib a !nāsa tsûadanasa nē mâsib !nâ. ǂKhawusa !khō!oamariǀgaugu xa ra !aromahesen ge !nāsa ǀammi di ǁgau!nâ-aon, ǀae!khō-aon tsî ǀawa!namna ǀnî !âgu ǁga ra ûi-ôa !gâi !khō!oamariden ra hōba tsî ǁnās ǀkha nē mâsiba ob ra khao-oa o ra khao-oa kai. Nēsis kōse i ge Namibiab ǀAwa!namn ūhâ sîsensoadi 22 161de xu 14 264di ǀguide khoen xa hâ!nâhe. ǀAe!khōs !âb !nâ i ge nēsi 4 848 ǀae!khō-aona a sîsenxa xawes ge nē ministrisa nē !gôab xa ǀgam !nāra a !nāsa !gôab ǀae!khō-aona ǂhâba hâ.
Ministris ǁGau!nâs dis di ministeri, Dr David Namwandib ra mîsa !oab ge Namibiaba 24 000 ǁgau!nâ-aona nē da ra !hoa ǁaeb ai ūhâ, xawe da ga ǀgôan !gôaba !oa nî kōs kara o da ge ǁaupexa 30 000 ǁgau!nâ-aona ǂhâba hâ. Paulus, ministris ǂurusib dis mâisas ge ra mî, !nubusib ǀae!khō-aon dis ra ǁanǂgāsaben ǀomkhâi ra !gôab, sîsenaon sîsenǀûs tsî ǂgui !gôab di Namibiaǁîn aitsama mâbasen hâ ǀae!khō!khaiga mataresa a sī!nâ ǁoa tsî ǂhanub ǀae!khō!oabade ra sîsenū tsî nēs ǀkha sîsenaon !gôaba ra !nās hân xa ra !aromahe. Nampols ge ra mî, ǀgaisa dītsâdi ǁîn ǀkhāba xu hâ ǁkhāǁkhākhâide ǀasasen ra !gae ǀawa!nam studentna mâs !nâ xawen ǀgaisa !nubusiba on ra hō o ra hōsa. Hoa !nona ǀawa!namn di ǁkhāǁkhākhâis!- khaigu ain ge 2 000 ǀawa!namn ǀguina ǁkhāǁkhākhâide a mâ ǁkhā xawen ge ī ǁoa i a xawe nē !gôaba 2 800 kōse ge ǂhākhâi nē proxrammi ǀasa studentna ǁkhāǁkhākhâis dib !nâ.