ǃNakaǂnôa Ministers Esther Muinjangues ge ge ǂanǂan, ǁaupexan 302 khoena ǂâisāhe ra Covid-19 ǁōs ǀkha noxopa ǃkharaga hâǃkhain Namibiab din tawa ūǀgarahe hâsa. Nausas ge ǁîsa ge mî, 34 khoen hîa Netherlandsa xu ge a ǂgâxa tsî 14 tsēdi ǁaeba ǀguri Greiters Konferensi Senters, ǀAeǁgams aiǂoas ǃauga ǁgoes tawa ūhâhe hâ in, tsîn ge ǁîn ǂgaoǀkhāsa ǁaeba a dītoasa.
!Nakaǂnôa Ministers ge ge mî, nē 34 khoen ge hoan hîa Greitersa xu a ǁnāxūhesa ǁnāpan ge ǂhâbasa ǂkhâǃnâs tsî ǂhâbasa ǀgaiǀgaiǃnâs ǃhoa-ūde a hōs khaoǃgâ. ǁNān hîa noxopa ǀguri ūhâhe hân ǁaegu hân ge 40na Hardap ǁKhaeb tawa, 39 Rock Lodge tawa, 22 Gross Barmens tawa, 62 Zambezi Waterfronts tsî Tourism Parki tawa, ǁnāpan 139 khoena !kharaga !khain tawa ǀAeǁgams ǃnâ ūǀgarahe hâse. Muinjangues ra mîsa !oan ge hakana, ǀAeǁgams ǃkharaga ǃkhain tawa ūǀgarahe hâna xu Covid-19 ǀkha ra ǃgaeǁarehe ǁgauǁgaude ge ūhâ i, ǁnāpan Zambezib tawa hâna xu ǃnonana ǁkhā ǁgauǁgaude gere ǁgause.
Namibiab !nâ di ge Covid-9 ǃnaeǃkhaide noxopa 16 ai mâ, nēsis kōse i ǁōǂoa hâ khoe-e a ǀkhaise. “Nē disiǃnaniǀana xun ge ǃnonana ge ǁnāxūhe tsî omdi ǁga ge ǁaru, tsîs ge nēsa 13 khoen ǀkha ǃgau mâ hâ hîa ǀguri-ūhâs ǃnaka ra ǀaeǃkhōhena. ǂHanub ǀaedī-aob Dr Ismael Katjitaeb, ge ǂoa ge wekheb Denstaxs ai ge ǂanǂan Namibiab nēsis kōse 385 âitsâdi Covid-19 ǃaroma dī hâsa, ǁîna xūn 299 khoena nexatifse a ǂoaxa tsî ǀgamna ǁkhawa nî ǃâide dī-aihese ī, 31 ge ūǁnâhe tsîn 18 khoen ǃnuriga noxopa ǂoaxa tamase. “Sida ge nēsis kōse ra dītsâ nē ǃgôaba īǁkhā i as kōse ǃnaka ūǀgarasa tsî ǀgores ǀkha ra ǂgom ǁnāti i nî hâsa. Noxopa da ge ǁkhōǁkhōsase Covid-19 ǀkha ǀae hâ khoe-e ūhâ tama hâ. ǀNîn ge drepgu ai ra mâihe, xawe i ge noxopa ǀommi ǃgomsiba ǀgaisase ūhâ khoe-e a ǀkhai,” tib ge Katjitaeba gere ǁguiǃā.
ǁKhātib ge ǀaro tsî ge mî, ǁnā haka khoen hîa Eros Anikuniǂgās tawa ge ūǀgarahe hâ in ge 14 tsēdi khaoǃgâ coronaoǃnâse hōhe tsî a ǁnāxūhesa.