Obrein Simasiku
OMUTHIYA – Opolisi mOshikoto oya gandja omageelo ge na ongushu yi thike poN$98 000 kaakayulinyanga mboka ya adhika taya landitha omalovu meholamo, shoka shi li ompinge nooveta ndhoka dha tulwa po dhomeendelelo okukeelela etaandelo lyomukithi gwocoronavirus. Aantu yamwe ye li yatano oya li wo ya mangwa po sho inaya iyutha koompango.
Inspekta Ellen Nehale okwa li a popi kutya omwaalu nguka ogwiipotha ya ningwa pokati komasiku 28 Maalitsa nomasiku 6 Apiilili.
“Momageelo 47 ngoka ga gandjwa, omuntu gumwe okwa futa nale N$2000 nangashiingeyi otwa tegelela yakwawo ye li 46 ya fute nenge ya ka holoke komeho gompangu.” Osho Nehale a ti ngaaka.
Ta ti kutya opolisi otayi kaleke po oveta nelandulathano, yo taya gandja wo uuyelele wa pumbiwa koshigwana ashike kape na ohenda kwaamboka taya ka adhika taya taaguluka ooveta dha tulwa po.
“Mboka taya eta uupyakadhi ngashiingeyi oomboka ye li momikunda moka ya lundululila omashingithilo gawo momapya osho wo momaluhwa. Ashike otandi mu kwashilipaleke kutya itatu ka thiga emanya lya londa kekwawo. Otandi pandula woo aaleli nookansela yoshigwana mboka haye tu yakele ko kombinga yaantu mbaka,” ta ti ngaaka.
Ta tsikile wo kutya iilonga yopolisi otayi kala yaa na omwago ngele aakwashigwana oya kala taya longele kumwe nokugamena aakayulinyanga mbaka.
Ta ti ope na wo uupyakadhi wokwaaiyutha koompango dhomeendelelo ndhoka dha tulwa po ngele tashi ya kokuhumbata aafaalelwa miihauto, ta ti yamwe inaya hala oku iyutha kokukala ye na aantu mboka ya uthwa pethimbo limwe- aafaalelwa yatatu moohato dhootuukala, nayane moohauto ndhoka hadhi humbata aantu yaheyali
“Aahingi yetu naya uve ko na inaya dhilaadhila ashike kombinga yiimaliwa, oshoka otaya tula oonkalamwenyo dhaantu moshiponga. Onkene natu iyutheni koompango opo omukundu nguka gu potokononwe,” ta gandja omayele ngaaka.