OSHAKATI – Uuministeli wuuhaku nonkalonawa owa ndhindhilike uunkundi wopamadhiladhilo wa indjipala, shoka tashi indjipalitha omayikuthomwenyo oshowo omadhipagathano moshilongo.
Uuministeli wuuhaku okwa li wa popi ngaaka esiku lyuundjolowele wopamadhiladhilo ndjoka kwa li lya dhimbulukiwa mEtitano pomatala gaShakati mOshitopolwa shaShana.
Esiku ndyoka lya dhimbulukiwa wo muuyuni, olya totelwe po mesiku eti-10 gaKotoba 1992 nongashingeyi ohali dhimbulukiwa omumvo kehe.
Nuumvo olya li lya dhimbulukiwa kohi yoshipalanyolo “Okuweeta elunduluko okupitila momatokolo.
Natango okwa lopotwa oshitopolwa shaMusati osho shi li pombanda momayikuthomwenyo, niipotha 121, omanga oshitopolwa shaKharas shi na iipotha iishona mbyoka yi li ihetatu ashike.
Iipotha mbyoka oya yalulwa ashike okuza Januali sigo Apilili nuumvo.
Minista guhaku nonkalo nawa Kalumbi Shangula momushangwa ngoka gwa li gwa leshwa kungoloneya gwoshitopolwa shaShana Elia Irimari okwa ti, okwi imangeleka oshowo okulongitha iifufuta oyo yimwe ya konekiwa ya lobgithwa koyendji yi ikutha oomwenyo muuyuni awuhe.
Omundohotola gwuunkundi wopamandhilandhilo Admus Moges esiku ndyoka okwa li a fatulula kutya omukithi ngoka inagu yooloka nando komikwawo.
“Oyendji oya tongola aanuumvu ye na uunkundi wopamandhilandhilo, kwaamboka ye na omikithi dhilwe ndhi ili, ihe shoka kashi li mondjila,” ta ti ngaaka. Okwa gwedha ko kutya opu na ompumbwe onene opo omahangano geye po noopoloholama dhowina dha nuninwa okukeelela omukundu gwuuvu wopomadhiladhilo, opo ku keelelwe oshiponga shika moshigwana. Ta ti, shoka hashi etitha omaimangeleko, oshowo uuwehame wopamandhilandhilo okwa kwatela mo iinima oyindji, ngaashi iikolitha oshowo oonkalo dha taalelwa momagumbo.
“Omukundu gwuuvu wopamandhilandhilo moshigwana omunene unene okuyelekanitha nuuvu uukwawo mboka ihawu taambathanwa,” ta popi ngaaka.
Omulongi gwaapangi moshiputundhilo shopombanda mOshakati, Anna Haifete okwa totha mo iikolitha niingangamithi oyo tayi ndhana onkandangala mokweetitha epiyaganeko lyomandhilandhilo momuntu.
“Okunkundipaleka omandhilandhilo oko haku etitha omuntu a kalonge iilonga inaayi uka oshoka, omandhilandhilo itaga longo we ngaashi shi na oku kala, oshoka uuluwi owa piyaganekwa,” ta fatulula ngaaka.
-vkaapanda@nepc.com.na