OKAHAO – Ovanhu 570 mwa kwatelwa ounona 40 va kwatwa komanyutu ova pewa oikulya kelelo lopamufyuululwakalo laNgandjera oshivike sha dja ko kOkahao. 

Eumbo keshe ola pewa omaadi okulya neendooxa hamano deeshi nosho yo okakutu ko20kg momunhu keshe. 

Ohamba yelelelo laNgandjera Johannes Mupiya okwa ti oikulya oya pewa ovanhu va dengwa koshikukuta nove li momhumbwe yoikulya. 

Okwa ti omikunda 102 di li melelo laNgandjera oda mona omauwa okupewa oikulya. 

Mupiya okwa ti ombelewa yaye oya didilika ovanhu tava dengwa kondjala nosho yo ounona ve li koshipangelo shaKahao va kwatwa komanyutu. 

“Onda pula oovene vomikunda opo va shange omadina ovanhu ve li momhumbwe yeedja. 

Onda tuma natango omalenga mange opo a ka ninge omapekapeko koikadjo yavo kombinga yoshikukuta,” ta ti. 

Okwa ti konima ombelewa yelelo lavo oya landa oikulya ndele tai topolelwa oshiwana. 

Mupiya okwa ti elelo lavo otali lalakanene okushakeneka epangelo ondjilakati tashi pitile pamukalo wokuyambidida oshiwana noikulya. 

“Ohatu twikile nokuyambidida oshiwana noikulya molwaashi inandi hala okuuda omunhu a xulifa kondjala melelo letu,” ta ti. 

Okwa lombwela oshiwana opo shi kale tashi kwatafana neembelewa delelo ngeenge she lihanga shi li momhumbwe yoikulya. 

Mupiya okwa kumaida oshiwana opo shi longe nelitulemo momapya ndele haku pitila eengula keendingosho. 

Okwa weda po ta ti eendingosho nadi patululwe okutameka potundi 13h00. 

“Oovene vomikunda nava kwashilipaleke kutya kape na ondingosho tai patuluka eevili dongula,” ta ti. 

-fhamlwa@nepc.com.na