760 000 xa a !nāsa omaridi ge !hūb a ǂhabase !anu āǁgam-e ūhâ. Nē !gôaba xun ge 98.0%gu omde kai!ādi !nâ hâ tsî 83.5%gu dina a !garo!ā !âgu di. Nē !nurib ge 2023ǁ-î kurib !Hū!nāsi ǁAnǂgāsaben !Gôakhâidi dana !nuriba xu a ǂgaeǂuisa. 

!Nurib ra ǁgausa !oab ge ǀKhomas ǀkhariba ǀkharisi !harib ai ǁîb hoan xa a ǀgapi !gôab (98.7%) omaride ūhâ !norasa tsî a !anu āǁgam-e ūhâse, ǁnāpab Kunene ǀkharib ǁ-îb hoan xa a ǂam !gôaba (74.1%) ūhâ hîa. 

Namibiab di ai!gûs !anu āǁgam-e hoa !hūǁîna mās dis ge 83.55gu ai mā tsî 342 220 omaride ra ǂnûǁkhaeba. Kai!ā omaridi hîa !anu āǁgam-e ūhâdi ge 414 119 omaride !khōǂgā hâ, ǂhanub di ǁguiǂams !anu āǁgam-e !hūǁîna māsa ra ǀgonǀgon!gaose. !Kharagagu ǂhanub berodi tsî ǂnûiǂgādi ge ǂhanub projekdi !nâ-ū 12 ǁkhaega ge om sao ra ǀkharigu Ohangwenab, Oshanab, Kavangob Huriǂoas tsî Hardap hâgu !nâ. !Nona ǀasa ǁgampaigu di ǂnuwihes, !gâi!gâi!gâs ǀnaihâ ǁgampaigu dis, 34 ǁgamamde !anus tsî hāǀaro ra 146 ǀasa ǁgamamde !hūb a ǂhabase kurus tsîn ge kai !âba !anu āǁgam-e mās !nâ ge ǀhuru. Namibiab ge ǀnîkhamikō kai !āga nau !hūgu ǀkha ra ǀgoragu, aiǁgause !garib !āba !khawagas !nâ Suid Afrikab ǀkha tsî ǀawas !nâ Zambezib tsî Okavango !ākha hîa Angolab, Zambiab tsî Botswanab hâgu ǀkha ra ǀgoraguse, xawe gu ge nē !āga !nūse !hūǁîn ǁgam-e a hōxū ǁkhā !âga xu ǁgoe tsîb ge ǂganǀgaub ǁîga xu ǁgam-e ǂgaes diba kaise a ǀgapi. Kunene !āb hîa Angolab ǀkha ra ǀgoraguheb ǀguib ge haka ǀkharigu ǀawas diga āǁgam-e ra mā. 

ǁGam-i hîa ra ǁkhawa sîsenūs !aroma !anu!anuhe-i ge !nāsa kai !ādi Namibiab di di !nâ ra sîsenūhe, ǂgaiǀons ai Tsoaxubams, !Gomenǁgams, Tsumeb, !Gûxa-aibes, Kaiǁkhaes, Tsaraxa-aibes, !Garibams tsî ǀAeǁgams hâde. Dana!ās ge ǁkhawa sîsenūs !aroma ra !anu!anuhe ǁgam-e ǁaupexa 50 kuriga sîsenū !gôaxa, nē ǁgam-en 400 000 xa a !nāsa ǁanǂgāsaben ǀAeǁgams dina ra sîsenūse.